Tuirial bialah phal loh thil tih a tam vangin MPF-in ECI-ah complaint thehluh an tum

Mizoram People Forum (MPF) gen. hqrs. chuan October 30, 2021-a Tuirial bial MLA by-election neih tura campaign neih mekah phal loh thil tih a tama an ngaih avangin Election Commission of India (ECI) hnenah complaint thehluh an tum.

MPF chuan Tuirial bial MLA by-election lo awm turah inthlanna felfai leh thianghlim a awm theihna turin theihtawpa hma an lak thu tarlangin, "MPF local forum leh constituency forum-te tlawh chhuakin, political party tin candidate-te pawh kawm an ni. Hengahte hian MPF leh political party-ten thawhhona thuthlung an lo siam tawhte inhrilhthar lehin, inthlanna fel leh thianghlim awm theih tura ṭanlak dante sawiho a ni," an ti.

Tun hnaiah party hrang hrangte'n campaign an kalpui danah ECI-in model code of conduct a siam leh MPF leh political party-te thawhhthona thuthlung kalha hmalakna a awm nia an hriat thu tarlangin MPF chuan, "Sum leh therhlo hmanga vote zawn te, buh inphurhsak te, a thlawna ration buhfai sem te, JCB hmanga lei laih sakte leh ruaiṭhehte a awm niin hriat a ni," an ti a, pawi an tih thu an sawi.

MPF chuan political party-te campaign dan ṭhenkhat chu ECI model code of conduct-in a phal loh (corrupt practice) leh party-te nena thawhhona thuthlung kalh a nih avangin thuneitute hnenah hmala tura thlen an tum tih tarlangin, "Hetiang hmanga vote zawng lo tur leh thianghlim taka campaign kal pui turin candidate-te leh party worker-te kan ngen tak meuh a ni," an ti.

MPF chuan mipuite pawh candidate-te tihautak lo zawng leh thawhhona thuthlung pel zawnga beisei nei lo tur leh bial chhung khawtina MPF local forum leh constituency forum-te pawh theihtawp chhuaha thawhhona thuthlung hre renga vil tur leh mitmei veng turin an ngen a ni.

Vanglaini thudawn danin, MPF-te hian complaint hi vawiinah an thehlut dawn a ni.