Thawk ṭha tia fakna kan dawng ve nasa - Health Minister

Health minister Dr R Lalthangliana chuan Inrinni khan Thingdawl, Bualpui, Kawnpui, Khamrang leh Mualkhang tlawhin, Covid-19 do kawngah thawk ṭha tia fakna an dawn ve nasat thu a sawi.

Covid-19 avanga thi Mizoramah kan punve zel thu sawiin Health Minister chuan, "A pawi kan ti takzet a ni. Mizoramah chuan contact tracing lamahte kan hmalakna a ṭha a, a vei pawh kan inhmu tam ṭhin hle. Mah se, thawk ṭha tia fakna pawh kan dawng ve nasa a ni. Fakna kan dawnah hian keini chu fak tur pawh kan awm lo. Kan chhuan ber tur chu Pathian chauh a ni. Sorkar, kohhran, NGO, political party leh mimal tinte kan thawhhona a ṭha a, a lawmawm takzet a ni," a ti.

Dr R Lalthangliana chuan mask campaign an hawn tawh thu sawiin, "ZMC lama oxygen vuah ngaia kan luh lohna turin mask hi a tuam dan tur dik takin, khabeah ni lo i vuah dik ṭha ang u. Tuna Covid-19 vanga thi mi 380 vel kan neih zingah hian 80% hi natna benvawn leh natna khirhkhan nei sa vek an ni. Kan chhungkuaah hetiang natna nei sa leh kum upa lam kan awm a nih chuan i fimkhurpui hle ang u," a ti a, fimkhur chu kan him tlanna tur a nih thu a sawi.

Health Minister chuan tleirawl pakhat pawhin ZMC-ah ni tam leh zan tam a nu Covid-19 damlo buaipuiin a awmpui a, mask a vua ṭha a, a kai ve lo tih sawiin, "Mask vuah ṭhat hi kan damna leh himna a ni tih hre mawlh ang u," a ti.