KHAWTHLIR

Thisen pe
October 16, Inrinni khan KṬP, Chhinga Veng Branch chuan an kohhran hall-ah Aizawl Civil Hospital tan thisen unit 61 an pe a, petute mipa 45 leh hmeichhia 16 an ni. Aizawl Civil Hospital tan vek ṬKP, Republic Vengthlang Bialin unit 38 an pe a, petute mipa 29 leh hmeichhia pakua an ni a; ṬKP Shalom Unit-in blood bank-ah unit 11 an pe a, mimala a thlawna pe mi 24 an awm bawk. ṬKP, Bethani unit, Lawngtlai College Vengin an kohhran hall-ah District Hospital tan unit 30 an pe a, petute mipa 26 leh hmeichhia pali an ni.

Tanpuina hlan
AMC ward no. IX councillor B Lalawmpuii chuan Inrinni khan a bial chhung veng hrang hrang tlawhkualin, task force-te hnenah sanitizer, glove, hmaituamna, hypo, PPE leh test kit a hlan. Ward no. III councillor C Lalchhandami pawhin October 15 khan a bial chhung Ramhlun Venglai leh bial pawn Ramthar Veng leh Ramthar North Branch YMA hnenah India Cares leh Rise Infinity hnen aṭanga a hmuh oxygen concentrator pakhat ṭheuh a hlan.

Raltlan luhbelh
October 15, Inrinni khan Myanmar buaina avangin Hnahthial district-ah raltlan 35 an luhbelh a, nimin khan luhbelh an awm lo thung. Inrinnia luhbelh mi 35 nen hian Hnahthial dist.-ah hian raltlan 2,235 an awm mek a ni. Raltlante hi - Thingsaiah 900, Cherhlunah 168, Bualpui 'H' ah 151, Ngharchhipah 162, New Ngharchhipah 439, Tarphoah 92, South Chawngtuiah 25, Khawhriah 68, Tuipui 'D' ah 35, South Vanlaiphaiah pariat leh Hnahthialah 187 an awm mek a ni.

Curfew puang
Aizawl DC Dr Lalhriatzuali Ralte chuan Covid-19 laka mipui kan him zel theihna atana DME dept. thupek chhuah bawhzuiin, Aizawl khawpui huam chhungah October 17 aṭanga October 30, 2021 thleng zan dar 8 aṭanga zing dar 4 inkar pawn chhuah khap (curfew) a nih thu a tarlang.