Mizoramah BSNL broadband 762 dah tum

Bharat Broadband Network Limited (BBNL), Department of Telecommunications (DoT) chuan Azadi ka Amrit Mahotsav (AKAM) kal zelah October 16, Inrinni khan Sesawng khuaah broadband connectivity an hawng. BSNL hian Bharat Net phase-II project kaltlangin Mizorama thingtlang khaw 762-ah broadband pek an tum a ni.

Sesawng khuaa broadband connectivity hi Bharat Net phase-II project aṭanga pek a ni a, he project kaltlang hian Mizorama VC 762 hnenah broadband pek tum niin, khaw 241-ah hmanrua dah fel tawh a ni tawh.

Bharat Net Phase-II hnuaiah hian Sesawng-I VC pisa chu broadband hmanga thlunzawm niin Wifi kaltlangin khaw mipuite'n an chhawr ṭangkai thei dawn.

Mizoram DoT director C Lalhmachhuana chuan Comprehensive Telecom Development Project (CTDP) hnuaiah BSNL broadband luh lohna khuaah mobile tower 214 dah tum a nih thu a sawi bawk.