Mizorama hri vei hmuh aṭanga enkawl mek zat a tlahniam zel

Mizoramah ni thum chhung a zawnin Covid-19 hri vei hmuhin 1,000 a tling lo tawh a, Ningani khan 891, Zirtawpniah 932 leh Inrinni khan mi 948 hmuh a ni a, hri vei hmuh chhuah tawh aṭanga enkawl mek zat percentage pawh a tlahniam zel.

Nimin zing dar 8-a sorkar laipuiin India rama hri vei dinhmun a tarlan danin, Inrinni khan India ramah hri vei 14,146 hmuh chhuah a ni a, Mizoram chu India rama hri vei hmuh chhuah thar tam lamah palina leh hmarchhak state-a hri vei hmuh chhuah tam berna state a ni.

Inrinni khan Assam-ah hri vei 319, Manipur-ah 88, Meghalaya-ah 83, Nagaland-ah 24, Arunachal Pradesh-ah 16, Sikkim leh Tripura-ah paruk ve ve hmuh chhuah a ni. Hmarchhak state pariata hri vei hmuh thar belhkhawm 1,402 aṭanga 67.61% (948) chu Mizorama hmuh chhuah a ni.

Mizoramah hri vei hmuh chhuah tawh aṭanga enkawl mek dinhmun (percentage) chu a tlahniam zel a; October 10, Pathianni zing dar 8-a sorkar laipui report-ah Mizorama enkawl mek chu 14.77% a ni a, Thawhṭanni zingah 13.47%, Thawhlehni zingah 13.37%, Nilaini zingah 12.78%, Zirtawpni zingah 12.28% leh nimin zing khan 11.35% a ni tawh.

Hri vei enkawl mek percentage tlahniam mah se, Mizoram chu India rama hri vei hmuh chhuah tawh aṭanga enkawl mek tam berna state a ni chhunzawm zel a, Mizoram hnaih bertu Kerala state-ah chuan hri vei tawh aṭanga enkawl mek chu 1.89% a ni.

Hmarchhak state zinga hri vei tawh aṭanga enkawl mek tlem berna chu Tripura state a ni a, hri vei tawh aṭanga 0.12% enkawl mek an ni.