Vaccine dose 11,81,005 pek a ni tawh

India rama Covid-19 laka invenna damdawi (vaccine) pek ṭan ní, January 16, 2021 aṭanga October 16, Inrinni thleng khan Mizoramah Covid vaccine dose 11,81,005 pek a ni tawh a, heng zinga 4,90,808 chu full dose a ni.

Integrated Disease Surveillance Programme (IDSP) tarlan danin, October 16, Inrinni khan Covid vaccine dose 1,899 pek a ni a, mi 1,119 hnenah dose khatna leh mi 780 hnenah dose hnihna pek a ni. Vaccine pek tawh 11,81,005 zinga 6,90,197 chu dose khatna a ni a, 4,90,808 chu dose hnihna a ni.

Kum 2011 chiarpuia Mizorama mihring zat 10,91,014 aṭanga chhutin vaccine la kim tawh mi 4,90,808 chu mihring awm zat aṭangin 44.98% a ni.

Kumin January 16 aṭanga Inrinni thlenga vaccine dose 11,81,005 pek tawhte chu Mizoram sorkarin a pek dose 11,76,945 leh private facility-a pek dose 4,060 a ni. Mizoram sorkar ruahmanna hmunah dose khatna 6,88,054 leh dose hnihna 4,88,891 pek a ni tawh a; private facility-te'n dose khatna 2,143 leh dose hnihna 1,917 an pe tawh bawk.

Kum 18-44 inkarte hnenah dose khatna 4,11,508 leh dose hnihna 2,48,891 pek a ni tawh. Kum 18-44 inkara vaccine pek tawh zawng zawng hi dose 6,60,399 a ni a, Mizorama vaccine pek tawh zawng zawng 11,81,005 aṭanga 55.91% a tling.

Vaccine la tawh hlawm ṭhen hrang hrang zingah dose khatna la zat aṭanga chhutin dose hnihna/full dose la hnem ber chu kum 60+ category an ni a, dose khatna la tawh aṭanga 95.78% chuan full dose an la tawh. May 17, 2021 aṭanga vaccine pek ṭan kum 18-44 inkarte chu dose khatna la tawh aṭanga chhuta dose kima la tlem ber an ni a, dose khatna la tawh aṭanga 60.48% chauhin dose kimin anla la a ni.