MAHFED hmalak dan leh sum hman danah thil felhlel tam tak a awm niin a lang - ZPM

ZPM chuan thuchhuah siamin, Mizoram State Agriculture/Horticulture/Forestry & Marketing Cooperative Federation Ltd. (MAHFED) hmalak dan leh an sum hman danah thil felhlel tam tak a awm nia a lan thu tarlangin, a changtu minister C Lalrinsanga chu a haider nge, a hriatpui lo tih an zawt.

ZPM tarlan danin, MAHFED kalphung leh an hmalak dante RTI hmangin an zawt a, fruit, forestry & vegetable grower-te tana dinchhuah theihna tur khawpa hma la thei a ni a, grant pawh an hmu ṭha hle. Chutiang a nih laiin an hmalak dan leh an sum hman dante enin thil fel lo tam tak a awm tih hmuh a ni.

Ministry of Tribal Affairs aṭangin Institutional Support for Development and Marketing of Tribal Product/Produce Scheme hnuaiah MAHFED hian Rs. 6,96,00,000 an dawn thu tarlangin ZPM chuan, "He scheme aṭang hian staff hlawh leh allowance atan Rs. 51,50,635 lai an hmang. He pawisa hmanna hrang hrang en hian thil fel lo a lang nual," an ti.

ZPM chuan MAHFED hnuaiah Bairabiah warehouse cheng nuai 274 senna tur sak tum mek a nih thu tarlangin, "Heipawh hi en chian ngai tak niin, heti zat warehouse sak nan a sum sen hi a ngaiin a lang lo," a ti a, bulṭan tak tak a nih hma-a hmalakna tihtawp rih a, enṭhat an phut.

MAHFED-in anmahni dan siam bye laws leh MCS rules kalhin Rs. 1,95,00,000 member ni lo hnenah pawisa a pung awmin a puktir nia tarlangin ZPM chuan, "He thil phei hi chu serious case tak zet a ni. He mi puktir tura inrawnkhawm dan te, meeting thuchhuak te hi federation tih atana mawi lo leh awm lo tak a ni. Hetianga thuneihna dik lo taka hman leh sum tam tham tak in puktir hi a ṭha lo takzet," an ti.

MAHFED-in an chairman hman tur bolero an lei dan pawh action lakna tur tling nia tarlangin ZPM chuan, "A lei dan chhui chian a nih hian a lei theihna tura permission dan anga lak a awm lo. Chairman-in a thuneihna hmanga a lei tawp a ni ber," an ti a, bolero man atan Rs. 10,35,768 hman a ni chu ṭha an tih loh thu an sawi.

ZPM tarlan danin, audit report-a a lan danin he pawl hian mimal senso thlengin a rulhsak ṭhin tih hriatchhuah a ni. Audit report-in MoTA aṭanga an sum hmuh hmanna chungchangah society-te tana seminar-cum-training buatsaihna atana sum hman an tarlan phei chu pawm tlak a ni lo a ti hial a ni.

Board of Director (BoD) meeting vawi-7 neihna atana Rs. 1,01,419 sen a ni te, BoD member Honorarium atana Rs. 1,82,000 sen a ni te leh chairman leh vice chairman honararium atana Rs. 2,47,61 sen a ni te chu enchian ngai nia an hriat thu ZPM chuan an tarlang bawk.