Scho.-ah inkaihhruaina thar vangin hmalakna a khaihlak phah - MSB
Mizoram Scholarship Board (MSB) hotute chuan sorkar laipuiin inkaihhruaina thar a tihchhuah vangin pre & post matric scholarship sem tura hmalakna a khaihlak nia sawiin, tunkar chhung hian sorkar laipuiin pre & post matric scholarship 2020-21 la dawng lote hnena pek tur pawisa a rawn pek chhuah an beisei thu Vanglaini an hrilh.
Mizoram Scholarship Board (MSB) secretary Dr PL Ramliana chuan Vanglaini palai zawhna chhangin, pre & post matric scholarship pek chhuah dan chungchangah sorkar laipuiin inkaihhruaina thar 'New Procedure for Release of Fund' hmang tura state tinte a tih avangin tun hmaa scholarship an sem ṭhinna dan chu a hman theih loh tih a sawi.
Dr PL Ramliana chuan tunhma chuan MSB bank account pakhatah scheme hrang hranga scholarship tur pawisate a luh ṭhin thu sawiin, "Chuta ṭang chuan sem chhuah leh ṭhin a ni. Inkaihhruaina tharah chuan scheme tin tan bank account hran ṭheuh a ngai tawh," a ti a, pre matric leh post matric scholarship tan bank account hran ve ve an siam tawh thu a sawi.
Bank account siam turin duh duha tih theih a nih loh thu sawiin MSB Secretary chuan,"Finance dept.-ah phalna lak a ngai a, an phalnain account pahnih kan siam tawh. Chu chu Public Finance Management System (PFMS) lamin an pawm veleh a ngai a, a kawng a kual khawp mai. Tun thla tir lam khan bank account-te chu hman theih a nih thu Ministry of Tribal Affairs (MoTA) hnenah kan hriattir," a ti.
MSB Secretary chuan MoTA-a scho-larship lama thuneitu Joint Secretary nen an indawr reng thu sawiin, "Kar hmasa khan rawn pekchhuah an tum thu min hrilh a, mahse holiday leh MoTA Secretary office chawlh vangin an la final theih loh thu min rawn hrilh leh," a ti a, rawn pe chhuak thuai tura a biak reng thu leh tunkar chhunga an rawn pek chhuah hman a beisei thu a sawi.
MSB hian sorkar laipui aṭangin pre & post matric scholarship 2020-21 sem tur cheng nuai 1,197.18 an hmu tawh a, chu chu first instalment tih niin, Mizoram chhunga college leh univesity zirlai 15,828 hnenah sem a ni tawh. Tunah hian Mizoram pawna zirlaite leh pawl 11 & 12 zirlai 17,990 hnena pek tur (second instalment) cheng nuai 1,970.12 chu MoTA aṭangin hmuh a la ni lo.