Zoramthanga thubuaia thutlukna puan hun Tuirial biala inthlan tur vangin sawn a ni

Nimin kha chief minister Zoramthanga eirua puhna thubuaia thutlukna Special Court (Prevention of Corruption Act)-in a puan hun tura ruahman nimah se, Tuirial bial MLA by-election lo awm tur avangin sawn a ni.

Vanglaini palai zawhna chhangin special judge Vanlalenmawia chuan Tuirial bial MLA by-election lo awm tur vangin Zoramthanga thubuaia thutlukna puan hun sawn a nih thu hi a sawi a, "Inthlan a awm dawn a, chuvangin party-in an chuk luai luai tur ka duh lo. Inthlan zawh lamah sawn a ni," a ti. Thutlukna hi November 3, 2021-ah puan a ni dawn.

Zoramthanga thubuai hi October 8, 2021 khan a hnuhnung ber atan ngaihtuah a ni. Sorkar ukilte chuan ACB-in thubuai a chhuina, chargesheet chu pawm theih ni lo mah se, he thubuaia thuhretute thusawi hrang hrangte chu thu tlinga ngaihsak tur leh Zoramthanga chu thiltisual-a puh a nihnaah thubuai chhuitu ACB-in a chhui ang ngeia hremna na thei ang ber pe turin Court an ngen.

Hetihlai hian Zoramthanga ukilte chuan Zoramthanga puhna chu politics hmanga inbeihna mai nia a lan thu leh ACB-in sum lakluh leh thil neih inmil loa puhna leh thubuai danga a chhuina chargesheet Court-a an thehluhah puh a nihna finfiahna ṭha tawk tarlan a nih loh avangin Zoramthanga chu hrem a nih nachhan tur a awm lo tiin, thubuai titawp turin Court an ngen thung.

Zoramthanga eirua puhna hi thubuai chi hnih a ni a, pakhat chu sum lakluh leh thil neih inmil loa puhna niin, a dang chu Sihpir ram Aiipuka a huana sorkar bungrua dik lo taka hmanga puhna a ni.

Thubuai chhuitu investigating officer, khatih laia ACB-a dy. SP Vanramlawma chu a hriselna ṭhat loh avangin Zoramthanga puhna finfiah tura Court-a a inlan theih loh avangin thubuai a chhuina chargesheet chu thutlinga pawm theih a ni lo.

ACB lamin supplementary chargeshet a thehluh pawh pawm a ni lo. Chargesheet pawm a nih tak loh avanga thubuai chhuitu investigating officer-in Zoramthanga puhna Court-a a thehluh nawtreh tura Zoramthanga ukilin a ngenna chu Court chuan a lo pawm sak tawh a ni.

Zoramthanga supplmentary chargesheet-a cheng vbc. 9.9 chuang nei anga puhnaah investigating officer-in thuhretu atana a hman Zoramthanga unaupa L Nghakliana leh a u fapa Zoramchhanaten an sum an kawl tir niin Court an hrilh.

PRISM chuan Zoramthanga chungchangah hian thubuai an thehlut a, ACB chuan an chhui chian hnuah thutlingah ngaiin, September 15, 2010 khan thubuai ziahluh a ni.