Zoramthanga hi mi dik leh Pathian ṭih mi a ni tih miten an hria - Robert Romawia

MNF chuan nimin khan Zuangtui Veng, Aizawlah mithar lawmluhna hun an buatsaih a, a lawmluttu MNF president Zoramthanga chu mi dik leh Pathian ṭih mi a ni tih mite'n an hriat a nih thu a sawi.

Robert Romawia chuan MNF party chu kum 60 chhung a dinna ngaia nghet taka ding tawh a nih thu sawiin, "Kan hotute pawhin pawl an sawn an sawn ve lo. Kan party president leh CM ni bawk Pu Zoramthanga hi midik leh Pathian ṭih mi a ni tih miten an hria a, Zoram dung leh vangah MNF zawmtu an pung mek zel a ni. CM bial mipuiin an rintawkzia tilanga MNF an zawm sup sup hi ropui ka ti hle," a ti.

MNF Adviser chuan Mizoram Congress chu hruaitu an inthlak aṭangin an hniam nghal sawt sawt tih sawiin, "An Vice President tharin Congress party rei tak lo hruai tawhtute mitmei veng miah loa thu dengkhawng tak tak hmanga Congress hruaitu hmasate tihdik loh pholang zawnga thu a sawi ṭhin hian Congress dik takte rilru a tina," a ti a, mi tam takin Lal Thanhawla'n Congress a chhuahsan ruala an chhuahsan ve tur thu a sawi.

ZPM party-a an hotute chu mipuiin an hriatchian em emte vek an nih thu sawiin, "Pawl thar a lo din apianga a tlar hmasa-a awm fo tawh ṭhinte an ni a, 'kalphung thar' an tih fo chu mipuiin an hmu a, anmahniah an beidawng tawh. ZPM hotute mipuiin an thlir dan chu ZPM zawhah eng pawl nge an din leh ang aw tih a ni. Pawl thar an din leh hun mipuiin an chang mek a, an chan chhuah leh ngei tur niin a lang," a ti.

MNF thuchhuah tarlan danin, MNF Adviser hian an party-ah mi 47 a lawmlut a ni.