Hruaitu ṭha lo rei tak kan hrawn avangin kan ramin harsatna nasa tak kan tawk - Lalduhoma

Zoram Peoples Movement (ZPM) chuan nimin khan New Builumah mithar lawmluh inkhawm an buatsaih a, thusawitu ZPM leader Lalduhoma chuan hruaitu ṭha lo rei tak kan hrawn tawh avangin kan ramin harsatna nasa tak kan tawh thu a sawi.

Lalduhoma chuan ZPM chuan a thlawna sem tiamin vote an zawn ve ngai dawn loh thu sawiin, "Party dang pawh hian sem tiam zawngin vote zawng tawh lul suh se. Hruaitu ṭha lo rei tak kan hrawn tawh avangin kan ramin harsatna nasa tak kan tawk a, siamṭhat leh pawh huphurhawm tak a ni. Ram development mai bakah mihring development hi ZPM-in kan aupui a ni," a ti.

Tunlai hian ZPM ni lo der, a dera MNF leh Congress la ni ṭhahnem tak an awm nia sawiin ZPM Leader chuan, "Party dang kawr ha, thinlung ZPM hi an tam hle. ZPM rawn zawm duh, hming rawn pe, vauna tawk zui an tam hle a, chutiang kara mi 50 in rawn inlan thei hi in huaisen ka ti hle," a ti a, ZPM-a luh duh, ruling party a beisei la nei der derte ram siampui atan an nghah reng thu a sawi.

Lalduhoma chuan Congress tlakchhiat thu sawi tam a ngai lo tih sawiin, "Kum 2018 MLA inthlanah pathumna an ni a, 2021 AMC inthlanah pathumna an ni leh a, Serchhip by-election ah rin phak loh khawpin an tlahniam a ni," a ti.

MNF-te tehna tur chu an thutiamah a nih thu sawiin Lalduhoma chuan, "Krismas vawithum an hman zawh hnu hian kawngchhawng ban khat pawh kan la hmuh hmain leiverh lamah min liam san leh a ni. NLUP dawng tawh zawng zawngten kan dawn vek tura cheng nuai thum lah a reh vang vang," a ti a, IVth grade tenau, thlatin cheng sangli dawng tura mipui an tiam pawh a reh thu a sawi.

Thusawitu dang ZPM vice president Lalthansanga chuan, "ZPM party hi inrelbawl dan danglam tak nei, Val Upa Council (VUC)-in a uap tlat a ni a, VUC hi democracy lungphum ṭha taka ZPM in a kalpui theih nana ban nghet tak a ni. ZPM hi party dang anga mipakhat thu thu a kal chi hi a ni ve lo a, a huho a kalna, collective leadership hmanga in enkawl a ni," a ti. ZPM thuchhuah tarlan danin, inkhawmah hian an party-ah mi 50 lawmluh an ni.