All Mask Campaign pawtsei

Hmai tuamna vuah tura beihpuithlakna 'All Mask Campaign' hman lai mek chu October, 2021 chhung atana pawhsei a nih thu nimin khan Health minister Dr R Lalthangliana chuan Virtual Meeting-ah deputy commissioner, chief medical officer leh IPRO-te hma-ah a sawi.

Health Minister chuan kan dinhmun thlirin mask vuah tura inzirtirna chu ngawrh lehzuala kalpui a ṭula hriat a nih thu sawiin, "Hei vang hian All Mask Campaign hman lai mek October 20, 2021 a tawp tura tih chu October 31, 2021 thlengin kan pawtsei leh a ni," a ti a, campaign chhung hian ngawrh lehzuala mask vuah a him zia inzirtir a ṭul tur thu a sawi.

Khawvel leh India ram state dangte kalpui dan leh WHO, CDC-USA leh ICMR te ngaihdan zirchiangtu State Level Expert Team on Covid-19 Management rawtna angin symptom-based approach a sample test kalpui turin order tihchhuah thuai a nih tur thu sawiin Dr R Lalthangliana chuan, "Hemi chungchangah hian mipuite leh khawtlang hruaitute hrilhfiah kawngah nasa taka ṭan lak a ngai," a ti.

Meeting-ah hian district tin aṭangin DC, CMO leh DIPRO-ten report an pe a ni. Tun dinhmunah Siaha leh Saitual district tih lohah chuan positive hmuhchhuah thar zat zawi zawiin a tlakhniam thu te, kan fimkhur lehzual sauh a ṭul thute leh kan ṭan tlan chuan rei loteah kan ziaawm ve mai a rinawm thute an sawi hlawm a ni.