KHAWTHLIR

MPF-in complaint DEO-ah thehlut
Tuirial bial MLA by-election lo awm tura campaign beihpui thlak mekah Mizoram People Forum (MPF) chuan party nena an thawhhona thuthlung leh Election Commission of India-in election model code of conduct an siam bawhchhiatna a awmah ngaiin, nimin khan Kolasib district election officer (DEO) Dr H Lalthlangliana hnenah complaint an thehlut a, a ṭul anga hma la turin an ngen. MPF chuan sum leh therhlo hmanga vote zawn te, buh inphurhsak te, a thlawna ration buhfai sem te, JCB hmanga lei laih sakte leh ruaiṭhehte a awm niin an hria a ni.

Hmalakna sawiho
Aizawl District Level Committee on Azadi Ka Amrit Mahotsav (DLC-AKAM) chu nimin khan an chairman Dr Lalhriatzuali Ralte, bawrhsap hoin an ṭhu a, department hrang hrang hmalakna leh thawhho theihna turte an sawiho. An hmachhawpte chu October, 2021 chhungin Aizawl Bawrhsap hnenah thehluh nise an ti.

CCC ṭanpui
Mizoram Pradesh Youth Congress president Dr Lalmalsawma chuan nimin khan Baptist Covid Care Centre, Serkawna hman turin coffee machine a pe. Dr Lalmalsawma chuan Baptist Kohhranin chhim lam atana CCC an buatsaih thei chu lawmawm a tih thu a sawi.

Tihdikna siam
Mizoram sorkar thupuangtu Information & Public Relations department chuan October 16, 2021-a 'Sesawng khuaah BSNL-in broadband connection thar thlung' tia an tarlan chu tihsual palh a nih thu an tarlang a; BSNL tih chu BBNL tih tur a nih thu leh, 'Comprehensive Telecom Development Project (CTDP) hnuaiah BSNL broadband luh lohna khuaah mobile tower 214 dah tum a nih thu a sawi bawk,' tih chu, 'CTDP hnuaiah mobile signal la awm lohna khuaahte mobile tower 214 din a nih tawh thu a sawi bawk,' tih zawk tur a nih thu a tarlang.