Union Minister-te'n Alliance Air an vailiam

Lengpui Airport-a Alliance Air thlawhtheihna thar service tur chu nimin khan Delhi aṭangin Civil Aviation minister Jyotiraditya M Scindia leh Union Minister for State for Road Transport & Highways and Civil Aviation general Dr VK Singh-te'n an vailiam a, Mizoram aṭangin minister Dr R Lalthangliana leh minister of state Robert Romawia Royte te'n virtual kaltlangin an lo ṭawiawm.

Alliance Air thlawhtheihna (ATR72) hi Aizawl, Shillong, Guwahati leh Kolkata-ahte a thlawk dawn a; Thawhṭanni, Thawhlehni, Ningani leh Inrinniahte a thlawk ang. Alliance Air hi Air India Limited Subsidiary Company a ni a, India ram chhungah a service a ni.

Aviation minister Jyotiraditya M Scindia chuan sorkar laipuiin India hmarchhak state-te a ngaihsak thu a sawi a, "Mizoram chu India leh Asia chhimchhak ramte thlunzawmtu state pawimawh tak a ni. Anthurium pangpar nasa taka thar chhuakin, state dang mai bakah ram pawn thleng a thawn chhuak a, thei thlai leh thildang hrang hrang nasa taka tharchhuaka thawnchhuak (export) tura potential nei a ni," a ti a, Lengpui Airport chu ministry-in passenger mai bakah bungrua (cargo) phur thlawhna ṭum theihna atana tihchangtlun tura a identify zingah a tel thu a sawi.

Dr V K Singh chuan Alliance Air kaltlanga Mizoram tana boruaka zinkualna tih changtlun a ni tih sawiin,"State leh airlines-te inkarah inhawng leh inpawh taka thawhhona ṭha awm zui zel se. Harsatna a awm palh pawhin rang taka chinfel a nih theih nan thawhhona ṭha nei ang che u," a ti a, airlines dang pawh Lengpui Airport thlunzawm tura hmalak tum a nih thu a sawi.

Dr R Lalthangliana chuan Regional Connectivity Scheme (RCS) kaltlanga sorkar laipuiin Mizoramah flight connection thar a siam chu lawmawm a tih thu a sawi a, "Kawngpui a ni emaw, thlawhna leh rel a ni emaw inkalpawhna ṭha leh ram hmasawnna hi a kal kawp tlat a ni. India ramah thlawhna service bulṭan a nih aṭanga la awm ngai lo Mizoram leh Meghalaya inkar direct flight siam a ni hi a lawmawm takzet," a ti.

Robert Romawia Royte pawhin thu sawiin, "Alliance Air in Lengpui Airport a rawn thleng chu sorkar laipuiin regional air connectivity tihhmasawn tura a hmalakna pakhat tihhlawhtlinna a ni," a ti a, khawpui palia chatlak loa thlawhna service awm ta hian hmasawnna nasa tak a thlen ngei a beisei thu a sawi.

Thlawhtheihna service thar vailiamnaah hian additional chief secretary JC Ramthanga, principal consultant aviation wing commander (Rtd.) J Lalhmingliana, Deputy Controlller, Aviation and Airline official leh AAI Airport incharge-te pawh an tel.