Minister in Graduation Day hmanpui

Champhai College chuan nimin khan an multipurpose hall-ah Graduation Day 2021 an hmang a, Champhai South bialtu MLA TJ Lalnuntluanga, minister of state in a hmanpui a, Eastern University Campus leh zirna sang zawka mamawhte dah turin a ṭul angte buaipui mek zel a nih thu a sawi.

TJ Lalnuntluanga chuan hlawhtlinna changte a lawmpui thu leh eizawng tlaka chherchhuaktu zirtirtute leh thawktute fakawm a tih thu a sawi a, "College hmasawnna kawnga hmalaknaah ka theih ang zawngte a awm a nih chuan ka inhawn reng a, Eastern University Campus leh zirna sang zawka mamawhte dah tura ṭul angte buaipui mek zel a ni," a ti.

College zirlaite chu chin tawk neia social media hmang thiam tura chahin TJ Lalnuntluanga chuan, "Thil ṭangkai tak ni mah se a hman dan kan thiam loh chuan a inkahpukchaw chho zel a, zirna leh hna dang thawh a tibahlah a, nakin zela ram economy thlenga nghawng thei a nih avangin hman dan kan thiam a ṭul hle," a ti a, thil post dawnin a nih dan dik leh thlen dan dikte zirchiang hmasa ṭhin turina chah.

Minister chuan zirlaite chu ram tana mi ṭangkai ni tura ngaihtuahna dik pu tlat tur te, mimal nun leh chhungkuaa harsatna tawhte chu hmasawn leh chhel nana hman ṭangkai thiam a ngaih thu te, an ngaihtuahna leh thiamnate ram tana hman tum turte leh midangte tana malsawmna ni turin a chah bawk.

He hunah hian stream pali aṭanga graduate thar mi 156 hnenah graduation certificate hlan a ni a, Champhai College aṭanga Mizoram puma political science subject-a parukna Khamkhanthawnga leh Economics subject-a pasarihna Lalzawmliana Khiangte-te hnenah Minister hian chawimawina thuziak a hlan.