National Deworming Day hawng

Health minister Dr R Lalthangliana chuan nimin khan video conferencing hmangin October 30, 2021 thleng awh tur National Deworming Day (NDD), 2021 a hawng. NDD hman chhung hian naupang leh tleirawl kum 1 - 19 inkarte hnenah a thlawnin rulhut damdawi (Albendazole) pek a ni ang.

Dr R Lalthangliana chuan sorkarin naupangte'n an ṭhanlenna kawngah hriselna ṭha an neih theih nan kawng hrang hrangin hma a la tih a sawi a, "Kum dangah chuan NDD hi sikul leh anganwadi centre-ahte ni khatah hman ṭhin a ni a, tun ṭumah erawh chuan Covid-19 vangin kar hnih chhung hman a ni dawn," a ti a, rulhut pai lo turin kut silfai ṭhat, thlai leh thei eitur silfai, tui thianghlim in, ek-in ṭha leh thianghlima inthiar, eitur khuh ṭhat, in leh a vel vawn fai leh khawlaia pheikhawk bunte a pawimawh thu a sawi.

Kum 2015 aṭangin India ram state/UT 11-ah NDD hi hman ṭan a ni a, February 2016 aṭangin India ram pumah hman chhunzawm a ni. He hmalakna hi rulhut pai vanga natna hrang hrang thleng thei - thisen tlakchhamna leh naupang ṭhanṭhu umbo nan a ni a, kum 1 – 19 inkarte hnenah kum tin rampum huapin ṭum hnih a ruala rulhut damdawi eitir ṭhin a ni. Kumin February thla khan Mizoramah neih a ni tawh a, kum 1-19 inkar 97.9% in damdawi hi an ei a ni.

NDD hawnnah hian National Health Mission mission director Dr Eric Zomawia, SPO (RCH) Dr Lily Chhakchhuak, Health department, School Education department, Women & Child Development department, Rural Development department leh PHE department aiawhte an tel.