Opposition leh ruling bial nihin awmzia a neih loh dan a in ang - MBJP President

Tuirial bial MLA by-election lo awm tur atana campaign-a feh chhuak mek Mizoram BJP president Vanlalhmuaka chuan tun dinhmunah opposition bial leh ruling bial nihin awmzia a neih loh dan a inan reng thu a sawi.

MBJP President chuan Tuirial bial chu bial ṭha leh fing tak an nih avangin hmasawnna tak tak an beisei tih sawiin, "Chung an beisei hmasawnna thawk tur chuan Mizorama sorkarna chelh mai a tawk loh zia an hria in a rinawm. Mipuiten kan beisei hmasawnna tak tak thlen theitu chu central-a sorkar lai BJP kan ni tih hi an hria a ni," a ti.

Tun dinhmunah opposition bial nih emaw, ruling bial nihin awmzia a neih loh dan a in ang reng nia sawiin, "Central aṭanga mamawh sawi chhuak thei leh tlangnel taka central minister-te be thei hi Mizorama MLA bial tinten tun huna kan mamawh ber chu a ni," a ti a, Tuirial bial mipuite chu an party candidate thlang tling turin a ngen.

BJP candidate K Laldinthara chuan Tuirial bial tana ding a nih angin, Tuirial bial hmasawnna thlen turin thapui a thawh tur thu a sawi a, "Tuirial bial mipuite zara thlantlin ka nih chuan MLA bial awhawm ber ni thei turin kawng hrang hranga hmalak ka tum a ni. Pathian khawngaihna zarah leh central ṭanpuinain bial hmasawn ber kan nih ka beisei," a ti.