Covid-19 vanga thi 388 tling tawh

Pathianni tlai dar 5 aṭanga nimin tlai dar 5 thleng khan Mizoramah Covid-19 vangin mi panga an thi a, Mizorama Covid-19 vanga thi zawng zawng chu 388 an tling tawh.

Nimin tlai dar 5 thlenga Covid-19 vanga thi 388 zinga 323 chu natna dang nei tel (co-morbidities) an ni a, Mizorama hri kai hmuh tawh 1,12,848 aṭanga thi 388 hi 0.34% a ni.

October 17, Pathianni zan dar 6:10 khan Zoramthara (69), Bawngkawn chu ZMC-ah a thi a, natna dang nei tel a ni. October 4 khan hri a kai tih hriat chhuah niin hemi ni vek hian ZMC-ah admit nghal a ni.

Hrangchalkapliana (79), Saitual chu Pathianni zan dar 7:40 khan ZMC-ah a thi a, natna dnag nei sa a ni. October 15 khan hri a kai tih hriat chhuah niin hemi ni vek hian ZMC-ah dah luh a ni.

Lalnghinglova (25), Rahsi Veng, Lunglei chu Pathianni zan dar 9:20 khan ZMC-ah a thi a, natna dnag nei tel a ni. October 9 khan hri a kai tih hriat chhuah niin hemi ni vek hian ZMC-ah admit a ni.

C Lalnunzira (60), Bethlehem Vengthlang chu nimin zing dar 3 khan ZMC-ah a thi. September 26 khan hri a kai tih hriat chhuah niin October 1 khan ZMC-ah dah luh a ni.

Lalramzauva (40), Vanzau, Champhai district chu nimin zing dar 4:30 khan ZMC-ah a thi. October 12 khan hri a kai tih hriat chhuah niin October 18 khan ZMC-ah admit a ni.