Covid-19: Mizoram dinhmun ; Hri vei 249 hmuh belh a ni

October 17, Pathianni khan Mizoramah swab sample 2,464 endik a ni a, Covid-19 hri vei mi 249 hmuh a ni a, hmarchhak state-a hripui vei hmuh chhuah tam berna a ni chhunzawm zel.

Pathianni tlai dar 5 aṭanga nimin tlai dar 5 thleng khan Covid-19 vangin mi panga an thi a, nimin tlai dar 5 thleng khan district pariatah hripui laka fihlim tawh mi 862 chhuahtir an ni.

Covid-19 vei Pathiannia hmuhte chu TrueNAT hmanga hmuh 18 leh RAT hmanga hmuh 231 a ni a; Fluorescent Immunoassay (FIA) leh ZMC RT-PCR hmangin swab sample endik a awm lo.

October 17, Pathiannia hri vei hmuh 249 zinga 119 chu mipa an ni a, hmeichhia 130 an awm bawk. Hri vei hmuh thar 249 zinga 199 (79.91%) chuan symptoms an nei a ni.

IDSP record angin, Mizoramah Covid-19 vei 1,12,848 hmuh chhuah a ni tawh a, mipa 55,197 leh hmeichhia 57,651 an ni. Nimin tlai dar 5 thleng khan mi 1,01,691 (90.11%) chhuahtir an ni tawh a, mi 388 (0.34%) thi tawhin, enkawl mek mi 10,769 (9.54%) an awm.

Pathiannia sample endik 2,464 hi TrueNAT hmanga endik 80 (3.24%) leh RAT hmanga endik 2,384 (96.75%) a ni a, hri vei hmuh 249 zinga 18 (7.22%) chu TrueNAT leh 231 (92.77%) chu RAT hmanga hmuh a ni. Mizorama Covid-19 vei hmuh tawh 1,12,848 chu mi 1,000 zelah hripui vei mi 103 an awm ang a ni a; mi 1,00,000 zelah Covid-19 vangin mi 35 an thi tawh ang a ni bawk.

Information & public Relations department in Pathianni zan dar 10:25-a a tarlan danin, Pathianni tlai dar 5 hnulamah khan Covid-19 hri laka fihlim tawh mi 611 - Aizawl district 578, Lunglei district 24, Champhai district pariat leh Saitual district aṭangin mi pakhat chhuah tir leh an ni. Heti hian tlai dar 5 hmalama chhuak mi 778 nen Pathiannia hri lak fihlim chhuahtir zawng zawng chu 1,389 a ni.

Nimin khan tlai dar 5 thlengin hripui laka fihlim tawh mi 862 chhuahtir an ni a; Aizawl district-ah mi 488, Siaha district-ah mi 149, Lunglei district-ah mi 105, Lawngtlai district-ah mi 58, Kolasib district-ah mi 32, Champhai district-ah mi 23, Khawzawl district-ah mi pali leh Saitual district-ah mi pathum an chhuak.