Hectare 2,000-a zaua oil palm chîng turin Central-in Mizoram tan target a siam
Union Cabinet-in oil palm lama hma thar lak an tumnaah Mizoram chu ram hectare 2,000-a chíng thar turin target siamsak a ni. Hetih lai hian, Agriculture department chuan hmalak a nih hmain oil palm-in environment a nghawng dan leh tuihna a tihkang dan mithiamte an zirchiantir phawt dawn.
Vanglaini palai zawhna chhangin Agriculture secretary J Hmingthanmawia chuan, sorkar laipuiin Mizoram chu hectare 2,000-a zau oil palm chíng turin target a siam thu a sawi a, "Central sorkarin oil palm-a hma a laknaah oil palm chìn bakah, link road siam thar leh link road awm tawh sa chei ṭhatte a huam. Hectare khat zela sum hmuh dan turte pawh an rawn ruahman sa vek a ni," a ti.
J Hmingthanmawia chuan, oil palm chungchangah sawi a tam thu sawiin, "Chuvangin, environment a nghawng dan, tuihna a tihkang dan leh ṭul dangte mithiamte kan zirchiantir dawn. Anni'n an hmuh chhuah aṭangin oil palm kalpui dan turah thutlukna siam theih a ni ang," a ti a; zirchianna aṭangin oil palm chìn a ṭha lo tih a nih chuan central-in target siam mah se, chìn theih loh thu thlen a ṭul theih thu a sawi.
August 26, 2021 khan Agricul-ture minister C Lalrinsanga chuan Vanglaini palai zawhna chhángin, oil palm chìn thar chungchangah ngaihtuahna an hman rih loh thu a lo sawi tawh a, "Oil palm chíng mek, eizawnna tak tak atana hmangte chu theihtawpin chhawmdawlna kan pe dawn," a ti.
Agriculture Minister chuan, Union Cabinet-in oil palm atan cheng vbc. 11,040 an pawm aṭangin Mizoramin a dawn zat tur hriat a la nih loh thu a lo sawi tawh a, "Mipuiin an ngaihven a, ngaihdan an sawi nasa hle. Mipuiin an sawite hi dawn nuam kan ti," a ti a, ṭhahnemngai taka Mizoram leilung humhalh duhtute an ṭâwmpui thu a sawi.
Oil pam chu sum lâk luhna atan bera hmang eng emaw zat an awm nia sawiin Agriculture Minister chuan, "Oil palm chíng mek, eizawnna tak tak atana hmangte chu theihtawpin chhawmdawlna kan pe dawn. Eizawnna atana hmanga inbéngbel tawhte kan thlahthlam dawn lo. Oil palm chíngtute'n harsatna an tawh ber chu kawng a ni," a ti.