Kum khatah kuhva rah leh pánhnah nuai 6,729 chuang man la lut ṭhin

Kuhva rah leh pán-hnah zuar pawl hruaitute chuan, phai aṭangin pánhnah leh kuhva rah kum khatah Rs. 67,29,60,000 man an lâk luh ṭhin thu an sawi. Hei hi Aizawla lak luh chauh a ni.

Vanglaini palai zawhna chhángin kuhva rah leh pánhnah zuar pawl hruaitute chuan, kum khatah kuhva rah leh pánhnah Rs. 67,29,60,000 an lakluh ṭhin thu an sawi a, "Heng bâkah hian phai aṭanga lak luh, Aizawl páwn lama khaw lian deuha pêk eng emaw zat a awm," an ti.

Bawngkawna Mizo pakhat, panhnah leh kuhva rah zuar chuan Zarkawt leh Dawrpui vela la luttute zingah Mizo aiin hnam dang an tam hle tawh thu leh, Bawngkawn lamah erawh chuan hnam dangte an la dan zel theih thu a sawi.

Kuhva rah leh pan-hnah zuar hruaitute chhinchhiah danin, tunlai hi kuhva rah, tuia chiah (scope) a tlâwm lai a ni a, truck phur khatah ip 400 awmin, ip khat chu Rs. 6,400 man a ni. Truck phur khat man chu Rs. 25,60,000 (400 X 6400) a ni a, chawlhkar khatah Aizawl bikah phur li a thleng ṭhin.

Panhnah chu Zarkawt leh Dawrpui area-ah chawlhkar khatah vawi thum motor pakhatin a thleng ṭhin a, a vaiin Rs. 28,35,000 man a ni a, thla khata lak luh chu Rs. 1,13,40,000 man a tling. Bawngkawn leh Zemabawk lamah chuan chawlhkar khatah panhnah Rs. 9,45,000 man an la lut ṭhin a, chu chu thla khatah chuan Rs. 37,80,000 man a ni.

Bawngkawn/Zemabawk lama Mizo panhnah/kuhva rah zuar pawl president Hmingdailova chuan, panhnah leh kuhva rah an lak luh, zuar chhawng lehtu zingah Bawngkawn/Zemabawk area lamah Mizo hming hawha hnam dang zuar turte chu an ûm chhuah zel avangin chawlhkar hnih/khat bak an zuar ngai lo niin a sawi.

Hmingdailova chuan, Dawrpui/Zarkawt (Aizawl bazarpui) velah erawh chuan chawlhkar khatah truck phur li pawh thleng se, Mizote'n phur khat leh a chanve vel bâk an zuar tawh lo niin a sawi a, "Hnam dang, Mizo hming hawha zuarte hian kar khata lo thlengah hian truck phur thum chuang an chang tawh. Tun hma aṭangin Mizote pawh ṭang turin kan nawr nasa ṭhin a, tunah chuan vaiho hi Mizo hming hawh hlir an ni tawh," a ti.
Phai aṭanga panhnah leh kuhva rah lak luhte chu Champhai, Siaha, Sakawrdai, Lunglei leh Lawngtlai lama phurh tlang nghal eng emaw zat a awm reng a; chungte nena chhût chuan kum khata Mizoramin panhnah leh kuhva rah a lak luh chu a tam zual hlea ngaih a ni.