Congress a ding chhuak leh dawn - Lal Thanhawla

Mizoram Pradesh Congress Committee (MPCC) chuan nimin khan Congress Bhavan-ah All India Congress Committee (AICC) general secretary (Mizoram changtu) Bhakta Charan Das pualin inkhawm an buatsaih a; MPCC president Lal Thanhawla chuan, Mizoramah Congress a dinchhuah leh dawn thu a sawi.

Lal Thanhawla chuan, 'Congress chu engmah an ni tawh dawn lo, an dingchhuak tawh dawn lo' tia an sawi ṭhin thu sawiin, "Mizoram Congress hi central Congress-ah kan innghat ngai lo a, kan innghahna chu chatuan lungpui Isua Krista a ni. Chuvangin, kan ding chhuak leh ṭhin a, kan la ding chhuak zel bawk ang. Kohhran hi kan zah em avangin kan unit-ah kan la chhiar ve ngai lo a, kan chhiar ngai bawk lo ang," a ti.

Mizoramin hma-sawnna ruhrel lian tham a neih - kawlphetha a siam chhuah zawng zawng te, Bairabi rêl kawng tihlen te, Sairang thlenga rél kal tur te, ramri kaltlanga sumdawnnate leh ram dang nena inkalpawhna kawng siam lai zawng zawngte chu Congress kutchhuak deuh vek a nih thu Lal Thanhawla chuan a sawi.

MPCC President chuan, State Referral Hospital siamna atan cheng vbc. 42 an dah thu sawiin, "MNF sorkarin a chèn zo vek a, ar-inahte an chhuah a, kan sorkar leh hnuah kan tihlawhtling. Kan rama thlai damdawite pawh fel taka zirchianna hmunpui ni thei turin medical college satliah mai ni lo, research tih theihna tur MIMER kan din a, MNF sorkarin medical college satliah ZMC-ah an siam leh ta a ni," a ti.

Lal Thanhawla chuan, amah tàntir tuma beih a tawh fo thu sawiin, "Mahse, an la hlawhchham zel. Pu Zoramthanga'n CM a nih zan lâ lâin police tírin min tàntir ngei tumin hma a la nghal a, document file hlui pui pui thir thingrem khat leh thuhretu 40 chuang a nei a, keiin engmah ka nei ve lo," a ti a; Court-in a dik lohna an hmuh loh avangin thiam a chan zel thu a sawi.

Amah mantir tumtu Zoramthanga chu a beidawng ṭhak nia sawiin Lal Thanhawla chuan, "Kei hian a tih ang hian tàntir tumin bei ve ta ila ka beidawn ka ring lo. A chargesheet-ah khan a chiang lêng làwng em mai," a ti.

MPCC thuchhuah tarlan danin, inkhawmah hian Lok Sabha MP candidate hlui leh Serchhip bial MLA by-election-a BJP candidate Lalhriatrenga Chhangte chu Congress party-ah lawm luh a ni.