IBSD-in Mizoram sorkar hnenah mobile RT-PCR van hawhtir dawn

Institute of Bioresources and Sustainable Development (IBSD), Imphal chuan Mizoram hnenah kum khat chhung mobile RT-PCR van a hman hawhtir dawn a, thawktu leh ṭul dangte chu sorkar laipuia Department of Biotechnology-in a rawn tum dawn.

Mobile RT-PCR van hman hawhtirna tura inremna thuthlung (MoU)-ah hian sorkar laipui aiawhin IBSD director Prof. PK Mukherjee leh Mizoram sorkar aiawhin IDSP state nodal officer Dr Pachuau Lalmalsawma ten hming an ziak. October 18, Thawhṭanni zan khan Manipur Film Development Corporation Complex auditorium, Imphal-ah Union minister of state Dr Jitendra Singh hmaah MoU an inhlan a ni.

Dr Pachuau Lalmalsawma chuan, mobile RT-PCR van chu hmarchhak state paliin an beisei laiin Mizoram chauh pek a nih thu a sawi a, "Hun rei tak ata tawh kan Chief Minister leh Health Minister ten an lo buaipui mobile RT-PCR van kan hmang thei tur hi a lawmawm hle a ni,"a ti.

Sorkar tarlan danin, Mizorama hman tur mobile RT-PCR van hi buatsaih mek a ni a, Mizoram a thlen thuai beisei a ni.