KHAWTHLIR

Thisen pe
KṬP, Mission Veng Branch chuan nimin khan State Referral Hospital (ZMC) tan thisen unit 68 an pe a, petute mipa 53 leh hmeichhia 15 an ni.

Thlai ṭiak sem
International Fund for Agriculture Development hnuaia FOCUS bultumin Mamit district Krishi Vigyan Kendra (KVK) chuan nimin khan Lengtea Hmingdailova huanah thlasik thlai hrang hrang chi an sem. He hunah hian tomato, hmarchapui, broccoli, zikhlum leh bawkbawn ṭiak eng emaw zat loneitute hnenah an sem a, chìn dan leh enkawl dan an zirtir nghal a ni.

Meizial man
Aizawla awm Assam Rifles-te chuan nimin khan Hnahlanah ram dang meizial báwmpui 52 an man a, a neitua puhte an man bawk. Foreign cigarette an man hi Rs. 67,60,000 hùa chhût a ni.

Minister-in enfiah
Aizawl West-II bialtu MLA Lalruatkima, minister of state chuan nimin khan a bial chhunga Tuikual North kawngpui lungrem chim a enfiah a, PWD Engineer-in-Chief leh local council member-te nen siamṭhat leh hmalak dan tur an sawiho. Minister hian Vaivakawn Zohnuai thlanmual bul kawng, NH-54 pawh thei tura siam mek a tlawh bawk a, bialtu councillor Lalfakzuala Chenkual-in a ṭawiawm a ni.

Vaccine sawiho
Champhai District Task Force for Immunization (DTFI) chu additional DC Henry C Lalrawnkima kaihruaiin October 18, Thawhṭanni khan DC conference hall-ah an ṭhu a; tun hnaia hripui vei hmuh chhuah 45%-te chu kum 18 hnuai lam, hri danna la lo an nih thu tarlan a ni. Ṭhutkhawmah hian, Covid-19 vaccine la lote'n an lak vek theih nan hmalak chhunzawm ni se, an ti a; tun hnaia hripui vei hmuh chhuah zinga 45% chu kum 18 hnuai lam, hri danna la lo leh, Champhai DCHC-a Covid-19 vei natna lang chhuak enkawl ngaite zinga a tam zawk chu vaccine la lo an nih thu an tarlang.