India-a hripui hluarna ber 3-na Mizoram

Mizoram chu state mipui zat aṭanga tehin Covid-19 hripui vei tam lamah India rama state 28 zingah pathumna a ni a, hripui hluarna ber pathumna a ni.

Kum 2011 chhiarpuia mihring awm zat aṭanga chhûtin, October 18, 2021 thlenga Mizorama Covid-19 vei hmuh chhuah tawh 1,13,801 chu state mipui zawng zawng 10,97,206 aṭangin 10.37 a ni a; Kerala-ah hripui vei percentage sáng berin, 14.55% a tling a, a dawttu Goa-ah 12.18% a ni. Union territory chhiar telin Lakshadweep chu Covid-19 vei tamna ber (16.08%) a ni thung.

India ram pumah kum 2011 chhiarpuia mihring awm zat 1,210,854,977 aṭanga chhûtin, October 18, 2021 thlenga Covid-19 positive hmuh tawh zawng zawng 3,40,94,373 chu 2.82% chiah a ni a; India ram pum percentage aiin Mizoram state bik percentage a sang zawk hle.

State mipui zat aṭanga chhûta Covid-19 vei tlemna ber chu Bihar niin, 0.70% a ni a, a dawttu chu Uttar Pradesh 0.86% niin, pathumna chu Jharkhand 1.06% a ni.

Sorkar laipuiin nimin zing lama Covid-19 report a tihchhuah danin, October 18 khan India ramah Covid-19 positive mi 13,058 hmuh chhuah a ni a, chu'ng zinga mi 953 chu Mizorama mite niin, hmuh chhuah zawng zawng aṭangin 7.30% a tling.

October 18 khan Mizoram aia hripui vei hmuh belh tamna state pathum - Kerala (mi 6,676), Maharashtra (1,485) leh Tamil Nadu (1,192)-te an awm. Hmarchhak state zingah Mizoram chu thla hnih chhung hripui vei hmuh tamna ber a ni tawh.

Mizorama hripui vei enkawl mek (active case) percentage a thlak hniam ve zel laiin, enkawl mek 9.99% chu India ramah a la sang fál zel. Mizoram dawta sang ber chu hripui vei mek tamna ber Kerala niin, 1.72% a ni a, Manipur (1.13%)-in a dawt leh a; heng state pathum chiah hi active case 1% aia a sànna India ramah a awm tawh a ni.