Party-te Tuirial bialah an campaign ngawrh

October 30, 2021-a Tuirial Asembly constituency-a by-election neih turah candidate palite leh political party hrang hrangte ngawrh takin an campaign mek zel.

Indian National Congress (INC) candidate Chalrosanga Ralte chuan nimin khan Bualpuiah lawm luh inkhawm a hmanpuinaah thu sawiin, politics chu rinawmna leh dikna nen an khelh chuan chung lamin mal a sàwm dawn tih a sawi.

Chalrosanga Ralte chuan, sorkar ding laiin by-election-a a tiamte a bawhzui zawh loh avangin an chunga mipui rinna a tlâkhniam thu sawiin, "Tun sorkarah by-election vawi thum kan nei tawh a, Serchhipah sorkar laiin an tiam ṭeuh kha a hlawhtlinna hmuh tur a awm meuh lo. By-election hmasa ber Aizawl West-I ah an tiam pawh tih mumal a la awm lo. Tuirial bial atana an rawn tiam che u phei hi kan hnung fál tawh lutuk a, rin tlak a ni lo," a ti.

Politics a khelh chhan chu amah leh a chhungte tan a ni lo tih sawiin Chalrosanga chuan, "Politics hi rinawmna leh dikna nen kan khelh chuan chung lamin mal min sàwm dawn a, chu chuan kan khelh chhan ram leh mipui hmasawnna a thlen ang tih ka ring tlat a ni," a ti a; bialtu MLA thi ta Andrew H Thangliana hmalaknate chhunzawm a tum thu a sawi bawk.

ZPM candidate Laltlanmawia chuan nimin khan Kawnpui khuaah Kawnpui khawtlang tana a hmachhawp hrang hrangte ZPM ṭhalai hruaitute a sawipui a; Kawnpui khuaa ṭhalaite rualawhna a hriatpui thu sawiin, infiamna hmunhma siam lamah nasa taka ṭan lâk a tum thu a sawi.

Laltlanmawia chuan, Kawnpui Vengthar leh Bangla Venga futsal ground chei te, Kawnpui Chhimvenga football khelmual laih tawh chhunzawm te, Venglai volleyball court-ah zana inkhelh theih tura light dah te, Hmarveng field tihchangtlunte chu a ngaih pawimawh tur thu a sawi a ni.

ZPM Candidate chuan, thlan tlin a nih chuan NH kawngpui 4 lane-a laih mêkah ram neitute'n zangnadawmna an hmuh theih nan theihtawpa hma a lâk tur thu a sawi bawk.

MNF vice president Lalthlengliana chuan nimin zing khan Lungdaia Upate Rûn leh khaw dang ṭhenkhatah thu a sawi a; Tuirial bial chu sorkar tan hmalakna châkawm taka siam turin bial mipui a chah.

Lalthlengliana chuan, MNF candidate vote tlin ngei a ngai nia sawiin, "Kan sorkar vanglai takin Serchhipah kan chak tawh lo a, he bialah hi chuan kan candidate in tihtlin ngei a ngai. Hei hian kum 2023 general election lo awm tur a hawlh tlang vek a ni," a ti.

MNF tluka political party ṭha Mizoramah a la awm ngai lo nia sawiin Lalthlengliana chuan, "Kumin hi kan kum 60-na a ni a, MNF anga party tlo a la awm lo. Ramri chungchangah keini tluka Assam hmachhawna do ngam an awm lo. MNF chuan kum 20 chhung India sorkar kan do ngam a ni," a ti a; party dang zingah ni khat pawh India do ngam an awm lo niin a sawi.

BJP Mizoram State president Vanlalhmuaka chuan nimin zing khan Kawnpui Chhimvenga BJP unit thar dinnaah thu sawiin, Mizoramah BJP-in hma a sawn zel niin a sawi a, "Mizorama party hrang hrangte'n lal inchuhin an inbei ṭhin a, BJP erawh chuan ramin, khuain, vengin hmasawnna rahbi thar a neihna turin development buaipuiin hna kan thawk zawk ṭhin," a ti.

Vanlalhmuaka chuan, Prime Minister-in miretheite harsatna sutkianna tura scheme hrang hrang a siamte'n a thlenna tur dik taka a thlen Mizoram sorkarin a hlau hle nia sawiin, "Eng emaw zat a hup bo ṭhin niin a lang. PM scheme-te hian a thlenna tur dik taka a thlen vek chuan Mizoram mipui hian Pu Modi-a an fak lutuk ang tih an hlau niin a lang," a ti a; PM scheme-te chu thingtlanga awmte'n an chhawr ṭangkai ṭhin thu a sawi.