All Mask Campaign bawhzui dan tur sawiho

Lunglei DC Kulothungan A kaihhruaiin October 18, Thawhṭanni khan Covid-19 laka himna leh hri inkai chhâwnna chhut chahna atana hmai tuamna hmang uar tura inzirtirna, All Mask Campaign kal mek awmze nei leh hlawhtling zawka hman a nih theih dan tur sawiho a ni a; thupek zâwm lote pawisa chawitira khauh taka kalpui ni se, an ti.

Ṭhukhawm chuan, campaign hmalakna a hlawhtlin lehzual nan cable TV-te kaltlangin hmai tuam pawimawhna chungchang sawihona buatsaih te, Lungleia chanchinbu hrang hrangah hmai tuam ṭangkaina uar zawka thehdarh te, dan kengkawhtute'n uluk zawkin hmai tuamna vuah leh vuah lo endikte an rél a ni.

Ṭhutkhawma tarlan danin, Lunglei district-a khaw hrang hrangah Covid-19 vaccine la duh lo mi 2,700 vel an awm mek a, chung mite chu an inah kal chilh a, hri danna lak pawimawhna leh a ṭangkaina hrilhfiah ni se, an ti.

Khawzawl bawrhsap CC Lalchhuangkima chuan nimin khan District Hospital-ah All Mask Campaign a hawng a, village task force-te hnenah hmai tuamna báwm khat ṭheuh a sem. DC chuan, campaign chhungin mi tinin hmai tuamna an hman ṭhat a ngaih thu leh inchhung khurah pawh vuah zel a ṭul thu a sawi.

All Mask Campaign bawhzuina tur zingah District Task Force aṭanga ngenna thuchhuah siam te, naupangin an hriatthiam theih nan media hmangin cartoon-a zirtirna thehdarh te, slogan point palite banner-a târ te, talk show buatsaih leh Khawzawla ni tin chhuak chanchinbu pahnihah campaign chhung zawng hmai tuamna hman uar inzirtina chhuahte a tel a ni.