COVID-19: Mizoram dinhmun Hripui vei 953 hmuh belh a ni

October 18, Thawh-ṭanni khan Mizoramah Covid-19 vei mi 953 hmuh chhuah a ni a, October thla chhungin mi 18,971 hmuh a ni tawh. Nimin khan hripui vei dam tawh mi 947 chhuahtir an ni a, Thawhṭanni zanah mi pathum leh niminah mi pakhat an thi.

Covid-19 vei Thawh-ṭannia hmuh tharte chu ZMC laboratory-a hmuh chhuah 160, TrueNAT hmanga hmuh 57, RAT hmanga hmuh 725 leh Fluorescent Immunoassay (FIA) hmanga hmuh 11 an ni.

IDSP record angin, Mizoramah Covid-19 vei 1,13,801 hmuh chhuah a ni tawh a, mipa 55,629 leh hmeichhia 58,172 an ni. Nimin tlai dar 5 thleng khan mi 1,02,983 (90.49%) chhuahtir an ni tawh a, mi 392 (0.34%) thi tawhin, enkawl mek mi 10,426 (9.17%) an awm.

October 18, Thawhṭannia Covid-19 vei hmuh thar mi 953-te chu symptom nei 488 leh nei lo 465 an ni a; tualchhunga kái mi 952 leh tun hnaia state páwn aṭanga rawn lut mi pakhat niin, tualchhunga kái zingah hri kàina chin hriat loh 403 an awm.

Kumin October thla chhungin hripui vei mi 18,971 hmuh chhuah a ni tawh a, chawhrualin ni tin mi 1,053.94 hmuh chhuah an awm ziah ang a ni. Kum 2011 chhiarpui aṭanga chhûtin Mizorama Covid-19 vei hmuh tawh 1,13,801 chu mi 1,000 zelah hripui vei mi 103 an awm ang a ni a; mi 1,00,000 zela Covid-19 vangin mi 35 an thi tawh ang a ni.

Nimin khan tlai dar 5 thlengin hripui vei dam tawh mi 947 chhuahtir an ni a; Aizawl district-ah mi 580, Champhai district-ah 136, Siaha district-ah 64, Lawngtlai district-ah 60, Mamit district-ah 51, Lunglei district-ah 28, Kolasib district-ah 23, Hnahthial district-ah pali leh Khawzawl district-ah mi pakhat an chhuak.

Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Mizorama hripui vei hmuh tawh 1,13,801 zinga mi 1,09,254 chu Mizoram chhunga kái chhâwng an ni a, mi 4,547 chu Mizoram páwn aṭanga an rawn luh hnua hmuh chhuah an ni.

Covid-19 positive hmuh tawh1,13,801 zinga mi 1,12,157 chu civil mi an ni a; BSF mi 741, Assam Rifles-a mi 344, CRPF-a mi 122, BRO/BRTF-a mi 156, sipai (army) 64, National Disaster Response Force-a mi 32 leh truck enkawltu mi 185 an awm bawk.