KHAWTHLIR

Thisen pe
May 19, Inrinni khan Aibawk Branch YMA chuan Aizawl Civil Hospital (ACH) tan thisen unit 69 pein, a petute mipa 63 leh hmeichhia pathum an ni a; ACH-ah hian individual donor mi 13 an awm bawk. Venghlui Branch YMA-in an diamond jubilee lawm nan Synod Hospital tan unit 51 an pe a, a petute mipa 45 leh hmeichhia paruk an ni. Haulawng Bial ṬKP-in Lunglei Civil Hospital tan unit 66 pein, a petute mipa 59 leh hmeichhia pasarih an ni a; Bungtlang South YLA-in Lawngtlai District Hospital tan unit 46 pein, a petute mipa 41 leh hmeichhia panga an ni.

Pentikos Ni
Nimin Pathianni kha Pentikos Ni a ni a, kohhran hrang hrangte'n an hmang. Pentikos tih hi '50-na' tihna a ni a, Thuthlung Hluiah chuan Kalhlen Kût ṭiah ní aṭanga ni 50-naah an hmang ṭhin a, Thuthlung Thar hunah erawh chuan Isua thawh leh ni, Easter Sunday aṭanga ni 50-naah hman a ni. Presbyterian Kohhran chuan Pentikos Ni hi PCI Assembly puala ṭawngṭai rual hun atan an hmang ṭhin.

Kawng siam
Kawnpui leh Hortoki inkar kawng km 18-a thui chu hmun ṭhenkhatah a chhiat tawh deuh avangin Inrinni khan Hortoki Joint YMA bul tumin hnatlanga siamṭhat a ni. Hnatlangah hian mi 70 vel an thawk chhuak a, lung lain kawng khuar leh diak lai an hnawh a ni.

Vawk chaw sem
AH&Vety department chuan May 19, Inrinni khan Serchhipa NLUP hnuaia vawk vulh thlangtu chhungkaw 74 hnenah vawk chaw an sem. Vawk chaw hi mi pakhat hnenah ip 12 (kg. 593) ṭheuha pek a ni. NLUP 3rd & 4th Phase-ah Serchhip distrct huam chhungah hian vawk vulh thlang chhungkaw 458 an awm a, beneficiary-te hnenah hian vawk in sak nan leh hmanraw ṭul dang lei nan pawisa fai Rs. 41,378 bakah vawk note 6 ṭheuh pek an ni tawh.