Dan loa khaw dinte chu enfiah rêl
Local Administration department secretary R Lalramnghaka hoin a pisaah May 18, 2018 khan Lunglei district leh Mamit district-a dan loa khaw din (thlawhbáwk) chungchang sawiho a ni. Meeting hi R Lalramnghaka'n a kaihruai a; Lunglei leh Mamit district-a LAD official-te bak-ah MZP hruaitute an tel a; dan loa khaw dinte chu enfiah an rêl.
Meeting-ah hian, Lunglei district leh Mamit district-ah dan loa khaw din a tam thu te, dan loa khaw din tam zawk chu Chakma leh Bru-te chenna a nih thu te, dan loa khaw dinte chu Chakma leh Bru foreigner ten inbenbel nan an hman thu leh, Mizoram khua leh tui nih tuma an beih ṭhin thute sawi sawi lan a ni.
Dan loa khaw din, thlawhbáwk khaw hrang hrangah sorkarin dan loa din a ni tih hre reng chunga sikul, kawlphetha leh mamawh dangte pein a inbenbeltir thu te, khaw thar an din belh zel a nih thu te, Chakma leh Bru ten dan loa khua an dinte chu sorkarin a ṭhiah thuai a ṭul thute sawi lan a ni bawk.
Lunglei DLAO chuan, tun hnaia Lunglei district chhungah dan loa Chakma khaw din thar, Chandobighat (Khojoysury bulah) hmuh chhuah thar a ni chuan a barakhaih thu a lang a; a rang thei ang berin Chandobighat chu enho nghal turin meeting chuan an rêl a ni.
Meeting chuan, dan loa khaw dinte chu hun remchang hmasa berah sorkar official-te leh MZP hruaite'n enfiah ni se, tiin an rêl. Mizoram chhunga dan loa khaw din enchiangtu tur State Level Screening Committee on Un-authorized Settlement emaw, District Level Screening Committee on Un-authorized Settlement emaw, a ngheta din a a awm loh thu an sawi a; dan ang taka Committee nghet din a nih theih nan Legislative Assembly-a bill pass tur duan tura buaipui nghal ni se, an ti bawk.