Lunglei kawng hmasawnna tur sawiho

April 18, 2018 tlai khan PWD minister Lal Thanzara hoin a pisaah Lunglei East bialtu MLA Joseph Lalhimpuia, PWD chief engineer (Roads) Lalrintluanga leh Geology & Mineral Resources department hotute an ṭhukhawm a; Aizawl leh Lung­lei inkar kawng hmasawnna tur an sawiho.

Meeting-ah hian, Geology & Mineral Resources hnathawkte leh PWD, Lunglei Circle ten April 18-21, 2018 chhunga Tlawng leh Pûkpui inkar kawng an zirchhianna Geological Assessment Report, Geology & Mineral Resources-in an siam chu sawiho a ni bawk.

Report chuan, Tlawng leh Pukpui inkar leilung rual­remlo leh nghet lo vangin kawng a ṭhat tur angin a ṭhat loh phah a, fûr laia ruahtui tla nasain leilung insawhnghet tur a timuang bawk tih a tarlang.

Kawng hnuaia tui paihna lungrem siamṭhat ngai lai hmun te, tuihâwk luankawr siam belh ngai te, geogrid/geoJute (kawnga bawlhhlawh/lei tla dangtu tur) pawimawhna leh hman thuai a nih tur chung­chang sawiho a ni bawk.

Meeting-a tarlan dan­in, kawng siam nan hian chak takin hma lak mek a ni a; Kanghmun South leh Pukpui inkar kawng siamṭhat nan NEDP aṭangin cheng nuai 1,000 hmuh tawh niin, Hau­lawng leh Dâwn inkar kawng siam nan NEDP aṭangin cheng nuai 100 leh State Priority Project (SPP) aṭangin cheng nuai 20 hmuh a ni.