NEICC inkhawmpui vawi 78-na a ṭiak

India hmarchhak bial­a kohhran pawl hrang hrangte inzawm khawmna, North East India Christian Council (NEICC) chuan May 17 aṭang khan inkhawmpui vawi 78-na an hmang a, nizan khan a ṭiak. Inkhawmpui hi KJP Synod Sepngi-in thlengin, New Nongstoin Presbyterian Church biak-inah nghah a ni.

NEICC inkhawmpuiah hian thupui chu 'Christ - The Living Hope' (Krista - Beiseina Nung) tih a ni a; May 18, Zirtawpni-ah Committee hrang hrang an ṭhut bakah, May 19, Inrinni khan nilengin rorel a ni. Mizoram aṭangin kohhran pawl hrang hrang aiawhte an tel a, Mizorama kohhran aṭangin chanvo nei eng emaw zat an awm a ni.

NEICC inkhawmpui hi tun hma lam chuan kum tina neih ṭhin a ni a, kum 2014 aṭangin kum kar thlakin neih a ni.

NEICC hi November 23, 1937-ah din a ni a, tunah hian Shillong-ah hmunpui a nei a; India hmarchhaka kohhran pawl hrang hrangte leh kohhran ni lo, Kristian pawl dang, para-church eng emaw zat an tel bawk. NEICC hnuaiah hian ṭhalai pawl NEICC Youth Assembly leh hmeichhe pawl NEICC Women Assembly an awm a; Union Christian College (UCC), Barapani, Shillong-ah an nei bawk.