Synod Bookroom-in budget Rs. 5,42,80,477-in an khûm

Synod Bookroom chuan May 18, 2018 khan Synod Office Devotion Room-ah Distributors Meet 2018 an hmang a; he hunah hian Synod Bookroom-in kum 2017-18 chhungin budget Rs. 5,42,80,477-in an khûm tih tarlan a ni.

Synod Prescom department sum enkawltu Rosy Lalhmingmawii tarlan danin, Synod Bookroom-in kum 2017-18 chhunga sum hmuh tura an ruahman (budget) chu Rs. 9,49,50,000 a nih laiin, Rs. 14,92,30,477 an hmu a, budget an khumna hi Rs. 5,42,80,477 a tling. An hlêp zat chu Rs. 2,17,74,447 a ni.

Bookroom distributor 32-te sum hmuh tura beisei chu Rs. 1,10,00,000 a nih laiin, a taka an hmuh chu Rs. 2,18,56,104 a a ni a, sum hmuh tura beisei an khûmna chu Rs. 1,08,56,104 a tling.

Synod Bookroom Distributors Meet-ah hian distributor ṭha pathum thlan an ni a, Prescom general manager Lal­hruaitluanga Ralte-in lawmman a hlan a ni.

Synod Bookroom hmunpuia building hlui, kum 1978-a hawn chu November 23, 2017 khan ṭhiah ṭan niin, ṭhiah zawh a ni tawh a, building thar ṭha zawk sak ṭan mek a ni. Building ṭhiah a nih avang hian Synod Bookroom hmunpui chu Synod Office Annexe bulding-ah dah rih a ni a, Bookroom office pawh Zosaphluia building chung berah dah rih a ni.