Mizoram sorkarin ramri chungchang zir chiangtu tur Committee a din

Chief minister Lal Thanhawla hoin nimin khan Cabinet Room-ah Mizoram leh Assam ramri chungchang sawiho a ni a; ramri zir chiang tur Core Committee an din.

Meeting-ah hian Home minister R Lalzirliana, Home secretary Lalnunmawia Chuango, PCCF Lal Ramthanga leh ramri enfiahnaa Mizoram team member-te an tel a; ramri chungchanga hmalak dan tur an sawiho.

Mizoram team-te chuan, Inner Line Reserved Forest sq. mile 509 huam chhunga dan loa thil tih a awm leh awm loh enfiah a nih dan te, state pahnihte duh dan a inan loh hnua ramri enfiah zui theih a nih loh dante leh, Assam leh Mizoram team-te Ministry of Home Affairs (MHA) Joint Secretary hoa Aizawl leh Silchar-a an inbiak dante an sawi.

Meeting chuan, ramri chungchang zir chiang turin Home additional secretary Lalbiakzama kaihhruai Core Committee an din a; Committee-ah hian sorkar official-te bakah, MZP aiawhte member an ni ang. Committee hian Mizorama tlawmngai pawlte'n Mizoram china an ngaih 1933 map-ah ramri chhinchhiahna a chiang tâwk loah a ngaih avangin, a zir chiang turin Core Committee a din a ni.

Core Committee hian 1983 map-a ramri awmte chu a hmunah kalin an zir chiang dawn a, July 2018 ral hmaa report thehlut hman tura tih an ni. An report aṭangin sorkar chuan a ṭul ang hma a la chhunzawm ang.

MZP president L Ramdinliana Renthlei chuan, Zofate Chawlhûuk sak an tum chu an la ṭhulh loh thu sawiin, "Core Committee report thehluh kan nghak ang a, sorkarin kan duh anga hma an la lo a nih chuan chawlhbuk sa turin hma kan la chhunzawm ang," a ti.

Tarlan tawh angin, MZP-in Bairabi Zophai hmuna Zofate Chawlhbuk sak an tum vanga buaina chhuak kal zelah MHA Joint Secretary ruahmanna angin Inner Line Reserved Forest sq. mile 509 huam chhunga dan loa thil tih enfiah a ni a; Zophai leh a chhehvel endik zawh tawh a nih laiin, Vairengte lam erawh chu endik a ni dawnah Assam leh Mizoram sorkar thu a inhmuh loh avangin endik hna chawlhsan a ni.

Ramri endik hna chawlhsan a nih hnuah MHA Joint Secretary hoin Silchar Airport-ah Assam leh Mizoram team-te an inbia a; MHA Joint Secretary chuan Mizoram sorkar chu duh thlan tur pahnih a siamsak a, Mizoram sorkar erawh chuan chhanna pe loin a ngawi zui a ni.