Hna thawk chhunzawm thei si loa phun phun hi Pu Hawla hna a ni - Zorama

MNF president Zoramthanga chuan nimin khan Mizo Hnam Runa in­khawmah thu a sawi a, "MNF sorkar hnathawh thawh chhunzawm thei si loa phun phun hi Pu Hawla hna a ni," a ti a; chief minister Lal Thanhawla chu thil hre chiang loa thu sawi mai zelah a puh.

Zoramthanga chuan, MNF chu sorkar leh duh luatah ruahmanna awm loin district pathum siam belh a, sikul 400 chuang upgrate-ah CM Lal Thanhawla'n a puh tih sawiin, "District pathum kan hawn belh kha MNF High Command-in uluk taka kan thlir hnuah Cabinet meeting-in ngun takin a bih chiang leh a, thu ringawtin a ni lo a, Cabinet Resolution leh Mizoram sorkar GAD record thlap a ni a, tunah hian en leh theihin a la awm vek a ni," a ti.

MNF President chuan, "Engkim ruahman fel vek a nih hnuah keiin Sai­tual district ka hawng a, Pu Tawna'n Khawzawl district hawngin, Pu Tlanga'n Hnahtial district a hawng. Heta tan hian nakkum leh a kum leh atana sum hman tur a awmsa tih kan hre vek. Ṭawngkam chauhin district kan hawng lo a, ruahmanna fel sa vekin kan hawng a ni," a ti a; district thar pathum chu Congress sorkarin tihpuitlin ngaihna an hre lo a, chutih laiin, Congress sorkarin district thar panga sum awm sa loa an hawn chu MNF sorkarin a tipuitling vek niin a sawi.

Zirnaa rualawhna vanga mipuiin sum thawh khawma sikul an din leh zirtirtute hlawh an pek ṭhin chu khawtlang tan phurrit a nih avangin, MNF sorkarin an khawngaih avang leh sorkarin a tih tur a nih avangin sikul tam tak chu dinhmun ṭha zawkah an hlangkai tih sawiin Zoramthanga chuan, "Kan sorkar ang a, tuna mi bâk pawh kan la tih belh dawn chauh a, kan hun laiin zirtirtute hlawh lak theih loh a awm ve ngai lo," a ti.

IR battalion din chungchangah Zorama chuan, "IR batallion pali kan din khan budget leh thil ṭul zawng zawng kan ngaihtuah sa vek a, hlawh lâk theih loh an nei ngai lo. Police batallion pakhat pawh din thei lote hian zu an zawrh avangin police tam tak an boral phah a, police hna 2,000 vel an ti ruak hial a ni," a ti a; MNF an sorkar leh chuan police hna ruakte an hnawhkhah vek dawn thu leh batallion thar an din belh zel dawn thu a sawi.

MNF President chuan, Citizen (Amendment) Bill chu MNF-in an duh lo bur tih sawiin, "Tih tak zetin kan do zel dawn a, India sorkar hian a tihpuitlin loh hram kan duhin kan beisei," a ti bawk.

Nimina Mizo Hnam Runa inkhawmah hian Aizawl East-I aṭangin mi pakua, West-I aṭangin mi pasarih leh South-I aṭangin pakua MNF-ah an lawm lut a, chu'ng zingah chuan MPS (Rtd.) Herman Sangthankhuma pawh a tel niin MNF thuchhuah chuan a tarlang.