MSU-in HSSLC-a ti ṭhate an chawimawi

Mizo Students' Union (MSU) chuan nimin khan Higher Secondary School Leaving Certificate (HSSLC) Examination 2018-a arts, science, commerce leh vocational stream-a Mizo zirlai ti ṭha pathum ṭheuhte lawmpuina hun Lal Thanhawla Auditorium-ah an buatsaih a; chief minister Lal Thanhawla leh Home minister R Lalzirliana ten an hmanpui.

Chief Minister chuan, kumin HSLC leh HSSLC result chu kum hmasa lam aia pass percentage a ṭhat avangin lawmawm a tih thu a sawi a, "Zirlaite taimâkna leh zirtirtute ṭan lakna a lawmawm hle. Hmasawnna ropui tak a nih rualin, a aia pass percentage sang zawk Mizoramin a neih a, mark percentage sang lehzual kan neih theih nan ṭan i la chhunzawm zel ang u," a ti a; zirlaite chu ram nghahfâk an nih avangin theihtawp chhuah turin a ngen.

Hna zawng zingah ram páwn aiin ram chhunga thawh tum an tam zawk chu Mizoram, ram nuam leh zalen a nihzia tilang chiangtu a nih thu sawiin Lal Thanhawla chuan, "Chutihrualin, Mizoram chhungah chauh hna thawh tum chuan ram tana kan ṭangkai lehzual theihna laka min phuartu a ni thei. Khawi hmunah pawh awm hreh lo leh tlangnêl tum a ṭul a, chutiang tur chuan ṭawng thiam a pawimawh a, state páwna invawrh sang tur chuan English leh Hindi thiam a ṭul a ni," a ti.

Minister R Lalzirliana pawhin thu sawiin, hlawhtlinna hmu turin pumpelh a awm theih loh thu a sawi a, "Awlsam taka hlawhtlinna dawn tumte chu tluang pur angin ngaih theihin awm ṭhin mah se, a tluantling ngai lo. Mahni thawhrimna leh taihmakna vanga hlawhtlinna chan hi a nuam a, sum leh pai pawh mahni thawhrimna rah a tlo zawk," a ti a; zirlai chawimawite chu tuna an hlawhtlinna chu khawvel hlawtlinna kawng an zawh tura rahbi hmasaah ngai turin a chah.

Zirlai chawimawina inkhawm hi MSU vice president Benjamin Lal­nghaka Fanai-in a kaihruai a, MSU president RB Lalmalsawma pawhin thu a sawi. Chawhnu lam­ah career awarness prog­ramme hman a ni.

Zirlai ti ṭha lawmpui­na hlante hi arts-ah C Vanlalremruati (Home Mission School), Jammy Vanhmingliana (Oikos HSS) leh Lalpianpuii (Synod HSS) te an ni a; Science-ah St. Paul's HSS zirlai pathum Angela Vanlalhmangaihi, Ruth Lalrinawmi leh K Lalrinpuii te an ni. Commerce-ah K Lalthansanga (St. Joseph HSS), Phillip Lalremtluanga (St. Paul's HSS) leh Lalrohlua (Oikos HSS)-te an ni a; Vocational-ah Lalhriatkimi (Mamawii HSS), R Laltlanmawii (Saitual HSS) leh C Lalhundika (Zemabawk HSS)-te an ni.