Sorkarin a hnathawkte hlawh June - Aug a puksak dawn Hlawh pûk zat tur tihchhuah a ni Rs. 40,000 aia tlem hlawhte a huam lo
Covid-19 avanga sorkar sum indaih loh phuhrûkna tura Mizoram sorkarin a hnathawkte hlawh a pûk tur zat chu Finance department chuan nimin khan a tichhuak. Thla khata Rs. 40,000 hlawh tling lote chu puksak an ni dawn lo a; hlawh puksak turte hian Rs. 40,000 aia tlem lo hlawh an lak theihna atan ruahmanna siam a ni.
Finance department-in office memorandum a tihchhuaha a lan danin, hlawh pûk tur hi thla thum - June, July leh August thla hlawh aṭangin a ni a; Rs. 40,000 aia tlem hlawhte bakah Health department leh Police department-a thawkte a huam lo.
Hlawh (gross salary) aṭanga pûk ṭhen tur zat chu - group A-te 15%, group B-te 10% leh, group C leh D-te 5% a ni.
Hlawh pûksak tur hian Mizorama thawk mek all India service leh central service officer-te, sorkar hnuaia public sector undertaking (PSU)-a thawk te, sorkarin ṭanpuina a pek aided institution te, society-te leh autonomous body hnuaia thawkte pawh a huam.
Hlawh puk hi sorkar sum dinhmun ṭhat hunah a pung awm loin instalment-in rulh tur a ni.
Bank aṭanga loan la sorkar hnathawkte chuan an duh chuan May 23, 2020 a Reserve Bank of India-in circular a chhuah angin, thla thum chhung hian loan an rulh loh dan tur an ngaihtuah thei ang.
Vanglaini palai zawhna chhangin Finance department hotute chuan, sorkar laipui aṭangin hmuh tur anga beisei an hmuh loh thu sawiin, "Tunah beisei ang kan hmuh loh piah lamah kan sum hmuh hi a tlem zawngin a kal zel kan hlau a ni. Chuvangin, invenna atan sorkar hnathawk hlawh puk phawt mai hi kan rel a ni," an ti.
Finance department hotute chuan Rs. 40,000 aia tlem hlawh chu batsak an nih dawn loh rualin, a chung lam hlawhte pawhin Rs. 40,000 aia tlem lo an lak theih dan tur ruahmanna an siam thu an sawi a, "Rs. 40,100 hlawh ta se 100 aṭang chiahin kan puk sak ang," an ti a, Group A leh B te chu 15% leh 10% pawh batsak se Rs. 40,000 an hlawh phak dawn tho thu a sawi.
Group D-te hlawh puksak an nih chhan zawhna chhangin Finance department hotute chuan, "Group D zingah hian a senior tawhte chu Rs. 40,000 aia tam daih hlawhte an awm," an ti.
Sorkar hnathawkte hlawhaṭanga thla thum chhung pawisa puk ṭhen hi May 22, 2020-a Council of Ministers meeting thutlukna anga tih a ni. Council of Minister chuan hlawh puk ṭhen dan tur kalphung, a zat tur leh a hun chhungte chu Finance department ruahman turin a dah.
Hlawh pûk ṭhen zat tur tehna gross salary tih hi sorkar hnathawkte basic pay ni loin, hlawh an lâk zat (thla khata an lâk zawng zawng) tihna a ni.
Finance department thu :
• Group A 15%, Group B 10%, Group C leh D 5% puk tur a ni
• Health leh Police department-a thawkte a huam dawn lo
• Sorkar laipui aṭanga sum hmuh a tlahniam a, a tlakhniam zel kan hlau
• Hlawh puk hi sorkar sum dinhmun ṭhat hunah a pung awm loa instalment-a rulh tur a ni
• Loan laten an duh chuan RBI circular angin thla thum chhung hi loan an rulh loh dan tur an ngaihtuah thei ang