Lirthei tlân dan tidanglam
Traffic SP H Ramthlengliana chuan thupek chhuahin, May 24, Ningani hian vice president Vankaiah Naidu-a'n Aizawl a rawn tlawh dawn avangin, Aizawl khawpuia lirthei tlân dan tur tihdanglam a nih thu a tarlang.
Traffic SP tarlan danin, May 24 zing dar 6 aṭanga tlai dar 5 inkarah kawngpui sira lirthei reng reng dah phal lohna hmun siam a ni. Chungte chu - Ṭhuampui Helipad péng aṭanga Mizoram University inkar - Bawngkawn, Edenthar Veng, Hunthar veng, Company pêng, Vaivakawn, Ramrikawn te, MZU aṭanga Raj Bhavan inkar - Vaivakawn, Temple Square, Tennis Court leh, Raj Bhavan aṭanga Ṭhuampui Helipad inkar - Treasury square, Zodin Square, Dawrpui, Zarkawt, Chanmari, Chaltlang, Bawngkawn te a ni.
May 24 zing dar 6 aṭanga tlai dar 5 inkara lirthei dah phal lohna hmunahte hian lirthei duh ang angin a tlân thei dawn lo a, lirthei neitute leh hmangtute chu an tum lohna lama intlantir a ngaih cháng leh rei deuh tak indintir a ngaih hunte a awm thei tih hre turin Traffic SP chuan a chah.