Citizenship Amendment Bill duh lohna MZP leh NESO-in Aizawlah an lantir

North East Students Orga­nisation (NESO) leh Mizo Zirlai Pawl (MZP) chuan nimin khan Vanapa Hall kawtah Citizenship (Amendment) Bill, 2016 duh loh lantirna, sit-in demonstration an huaihawt a; NESO leh MZP hruaitute bakah, zirlai eng emaw zat an tel.

Bill duh loh lantirnaah hian MZP president L Ramdinliana chuan, Citizenship (Amendment) Bill zir chiangtu Committee chu Mizoram tlawh ve tura an sàwm tawh thu sawiin, "Hmarchhak state an tlawh chuan Mizoram pawh tlawh ve min tiam. Mahse, tun thlengin min la tlawh loa, min tlawh loa he Bill hi an pass a nih chuan India sorkar hian Mizoram hi India ram bung khatah min ngai loah kan ngai ang," a ti a; Mizoram ṭhalaite'n a ṭul chuan rambuai leh an hreh loh thu a sawi.

MZP President chuan, Mizoram tlawmngai pawlte'n Citizenship (Amendment) Bill, 2016 an duh loh thu thuneitute hnenah an lo thlen tawh tih sawiin, "NGO-te hmalakna ringawt hi a tâwk tawh lo. Kan MLA-te hian Assembly House-ah he Bill duh lohna resolution pass se kan duh a, chu chuan Bill dodalna kawngah awmzia a nei lehzual ang. Bill duh lohna resolution pass ngei turin MLA-te kan ngen a ni. He Bill hi Mizo mipuite'n kan ngaihtuah chian lehzual a ngai," a ti.

L Ramdinliana Renthlei chuan, The Citizenship (Amendment) Bill, 2016 chu India khua leh tui zawng zawng nghawng a nih avangin ngun zawka ngaihtuah a ṭul thu sawiin, "Bill hi pawm a nih chuan Afghanistan, Bangladesh leh Pakistan aṭanga India-a lo lut - Hindu, Sikh, Buddhist, Jain, Parsi, Kristian emawte chu kum ruk chhung India-ah an awm tawh chuan India khua leh tui nihna pek tur an ni. Sakhaw behchhana khua leh tui nih theihna tur a ni ber," a ti a; Mizoram tan a him lo lehzual tih a sawi.

NESO finance secretary Ricky Lalbiakmawia chuan, India hmar­chhak state hrang hranga zirlai pawl intêlkhawmte telna NESO-in Citizenship (Amendment) Bill chu an duh loh vek thu sawiin, "Dan loa ram dang aṭanga lo lutte vangin hmarchhakin harsatna kan tâwk nasa ber a, chuvangin, Bill hi theihtawpa dodal kan tum," a ti a; Bill chu hmarchhakah hman ve ni lo se tih chu NESO ngaihdan a nih thu a sawi.

NESO hruaitute tun hnaia Gu­wahati-a ṭhukhawm chuan Citi­zenship (Amendment) Bill, 2016 do lohna lantirna atan hian hmar­chhak state tinah sit-in demon­stration huaihawt ni se, tiin an rel a; chumi ang chuan hmarchhak state khawpui tinah sit-in-demonstration huaihawt a ni tawh a, Shillong bikah chuan Bill copy hâl a ni.