KMMTTP kawngpui siam hna 75% zo tawh

Lawngtlai aṭanga Myanmar ramri Zocha­chhuah pawhna tur Kaladan Multi Modal Transit Transport Project (KMMTTP) kawngpui siam mekah hna thawh tur pumpui aṭanga 75% vel zawh a ni tawh a; kawngpui atana ram lâkah zangnadawmna phût an pun nasat avangin zawh hun tur sawi theih a la ni lo a, Zochachhuah khuaah inṭhiah ngai a la awm avangin laih tlang theih a la ni lo bawk.

KMMTTP kawngpui siam mek hi May 19, 2018 khan Ai­zawla MJA hruaitu bakah, Lung­lei leh Lawngtlaia MJA member ṭhenkhatte'n a hmunah an tlawh a, kawng siam enkawltu PWD hotute'n an dinhmun an lo hrilh a ni.

Kawngpui siam hi sorkar laipuia Ministry of External Affairs hmalakna niin, Ministry of Road Transport & Highways hnuaiah Mizoram PWD-in an vil a; October 12, 2010-ah hna thawh ṭan a ni. Kawng siam nan hian revised estimate siam a nih hnuah cheng vbc. 1011.52 a ni a; kawng thui zawng chu km. 87.18, a zau zawng metre 12 leh blacktop chin zau zawng metre 7 niin, blacktop chhah zawng chu lei lâwng aṭanga a pawnláng ber thlengin metres 0.66 tur a ni.

Tun dinhmunah kawng km. 87.18 siam turah km. 55 chu a nih tur anga zawh a ni tawh a, hna pumpui aṭanga 75% vel zawh a ni tawh. Hetih lai hian, hna thawh zawh hun tura ruat December 31, 2018-ah zawh hman a beiseiawm loh tih PWD engineer-te chuan an sawi.

PWD engineer-te sawi dan­in, KMMTTP kawngpui siam hi zangnadawmna phût an pun nasat avangin hna thawh chak theih a ni lo a, zangnadawmna phûttute'n ṭum eng emaw zat hna thawktute an lo dang tawh a ni. Kawngpuiah hian lei dawh tur pariat a awm a, dawh ṭan mek a ni.

Kawngpui hi Zachachhuah khaw chhung­ah in ṭhiah ngaite ṭhiah a la nih loh vangin laih tlang theih a la ni lo a, hmun dangah laih tlang rem lo tlem a la awm bawk a; chutih rualin, Myanmar ramri erawh laih pawh tawh a ni thung.

KMMTTP kawngpui siam hna hi Atlanta ARSS leh RDS Pvt.Ltd. ten chan insemin an thawk a ni.