Citizenship (Amendment) Bill chungchanga Mizoram sorkar hmalakna duhkhawp lo

PRISM party chuan Citizenship (Amendment) Bill, 2016 chung­changah chak zawka hma la tura Mizoram sorkar ngenna nimin khan Law & Judicial minister Lalsawta hnenah an thehlut. PRISM chuan, Citizenship (Amendment) Bill dodal tura hmalak kawng­ah Mizoram sorkar a che muang lutuka an ngaih thu an tarlang.

Law & Judicial Minister hnena lehkha an thehluhah hian PRISM chuan, Citizenship (Amendment) Bill 2016 chungchangah Chief Minister hoa meeting koh tura hmalakna chak zawk a kalpui turin an ngen a; Bill chungchanga May 12, 2017-a Minister Lalsawta hoa meeting-ah kal khawmte'n Bill dodal turin mipui zawng zawng lenna forum siam an duh a, Chief Minister kaih­hruainaa NGO, koh­hran leh political party zawng zawng huap meeting neih ni se, tia rêl a nih thu an tarlang.

Law & Judicial Minister hoa meeting thurel, Chief Minister hoa meeting neih tur chu koh a nih mai loh avangin August 17, 2017-ah chak zawka hma la tura ngenna an thehlut tih sawiin, PRISM chuan, "Tun thlengin a hlawhtlinna kan la hmu lo hi a mak kan ti a. Kan ram leh hnam himna atana chak zawka hmalak a nih theih nan meeting ko turin kan han ngen nawn leh che a ni," an ti.

PRISM party thu­chhuah chuan, Citizenship (Amendment) Bill 2016 chu pass a nih loh nan an theih ang angin hma an lak zel dawn thu a tarlang bawk.