Covid-19 vei phurtu vangin Edenthar-in curfew an puang

Delhi aṭanga June 2, 2020-a Vairengte kaltlanga Aizawla lut hnam dang pakhat chu Covid-19 vei a ni tih hmuh chhuah a ni. Hnam dang hi Vairengte aṭangin Pik-up hmangin Aizawlah hruai a ni a, pik-up khalhtu chu Edenthar Veng mi a ni; hei vang hian Edenthar Vengah curfew an puang.

Edenthar Veng Branch YMA hruaitute hnen aṭanga Vanglaini thu dawn danin, hnam dang hi Hunthar Venga lei tlahniama hna thawktute zinga mi a ni. Aizawl a thlen hnuah hotel-ah khung hran nghal a ni a, swab sample endiksak a nih hnuah Covid-19 a vei tih hmuh chhuah a ni.

Medical staff-te'n Covid-19 vei hnam dang chu Aizawla a luh dan an zawt a, chuta ṭang chuan Edenthar Venga miin pick-up in Vairengte aṭangin a phur tih hriat a ni. Hemi chungchang hi bialtu Chief Medical Officer chuan Edenthar veng khawtlang hruaitute a hrilh nghal.

Thil awm dan an hriat veleh Edenthar Veng khawtlang hruaitute chuan fimkhur thilah an veng chhungah curfew an puang nghal a, hnam dang phurtute chhungkua leh an ṭhenawmte chu páwna chhuak lo turin an hriattir. Lirthei khalhtu chu nimin vêk khan a swab sample lak nghal a ni.