Damdawi-ina thawk turin Saitual ṭhalai 26 an inpe
Saitual khawpuia ṭhalai mi 26, mipa 17 leh hmeichhia pakuate chu Covid-19 vanga Saitual District Hospital-a thawktu indaih loh phuhrûkna atan hlawh nei loa thawk turin an inpe.
Damdawi-inah thawktu an indaih loh avang hian Saitual Group YMA chuan Saituala YMA branch hrang hrang aṭangin tlawmngaia damdawi-ina thawkte pui tur an zawng a, mi 26 an inhriattir a ni.
Mi 26-te lawmna leh fuihna hun nimin khan damdawi-in tualah hman a ni a, district bawrhsap VL Hruaizela Khiangte-in a hmanpui.
Saitual DC chuan, hripui léng karah mi dangte pui tura che chhuak ngam an awm chu ropui a tih thu sawiin, "Kan vannei hle a ni. Hri léng hian eng chen nge a awh dawn a hriat loh avangin volunteer-te in thawhna turah mipui tan a ni tih hria a, tlawmngai taka thawk turin ka ngen che u a ni," a ti.
VL Hruaizela Khiangte chuan, Saitual district-ah Covid-19 vei mi pathum an awm thu sawiin, mipui nen inhnimhnaihna an neih loh avangin chîâi lo turin mipui a chah.
Volunteer-te lawmna thu sawitu Saitual Group YMA president C Lalkima chuan, "Mahni nunna thàpa ram leh hnam tana inpe YMA member mi 26 lai an awm hi a lawmawm hle," a ti a; inpete chu Saitual Group YMA-in a hriat reng tawh tur thu a sawi.
Damdawi-ina thawkte pui tura inpe zingah hian MBBS zirlai, nursing zir zo tawh (M.Sc Nursing, B.Sc Nursing leh GNM) leh laboratory technician-te pawh an tel a ni.