Aizawl khawlaia bawlhhlawh paih zung leh chil chhhakte hrem theih

Aizawl khawpui khawlaia bawhhlawh paih, chil chhâk, zun leh khawlai tibawlh­hlawh thei thil chi hrang hrang khapna dan hman a ni tawh a; bawlhhlawh paih vanga mana hrem an awm nual tawh laiin, chil chhâk, zun leh thil dang vanga man leh hrem an la awm lo nia thu dawn a ni.

Mizoram State Legislative Assembly chuan The Mizoram Municipalities (Third Amendment) Act, 2015 a pass a, chumi ang chuan August 18, 2015-ah Government Gazette hmangin hriattirna chhuah a ni.

The Mizoram Municipalities (Third Amendment) Act, 2015 Section 157-A ah chuan, vantlang hmuna bawlhhlawh paih leh khawlai tibawlhhlawha hriselna atana

ṭha lo thil hrang hrang khap thu a chuang a; Section 157-A (1) chuan kawngpui, kawng sir, vantlang hmun, khelmual, hall leh park-ahte bawlhhlawh eng chi pawh paih a khap.

Section 157-A (2)-ah chuan, inthiarna hmun ni loa zun leh êk reng reng khap a ni a; Section 157-A (3) chuan vantlang hmuna chil chhâk a khap. Section 157-A (4)-ah chuan, Section 157-A hnuaia sub-section (1), (2) leh (3) bawhchhiate chu Section 386-in a sawi angin hrem theih an nih thu a chuang bawk.

The Mizoram Municipalities (Third Amendment) Act, 2015 hi a nih tur ang taka hman a la nih loh avangin May 16, 2018-a Aijal Club-a UDPA department-in 'Waste Management’ tih thupui zirhona an buatsaihah UDPA minister Zodintluanga chuan, dan kengkawhtu tur Aizawl Municipal Corporation (AMC)-in chak zawkin hma la se a duh thu a sawi.

Mizoram Municipalities (Third Amend­ment) Act Section 157-A ken­kawh chungchanga Vanglaini palai zawhna chhangin AMC commissioner Dr H Lalthlangliana chuan, Mizoram Municipalities (Third Amendment) Act chu an kengkawh tawh tih a sawi rualin, a zavaia kenkawh a la ni lo tih a sawi a ni.

Dr H Lalthlangliana chuan, Mizoram Municipalities (Third Amendment) Act Section 157-A bawhchhiaa khawlaia bawlhhlawh paih, chil chhâk leh a hmun loa zungte chu Section 386 hmangin hrem theih an nih thu a sawi a, "Section 157-A hi kan enforce thei reng a, kan enforce mek bawk a. Mahse, totally-in kan la enforce lo. A zavaiin kan la ti thei lo," a ti.

AMC Commissioner sawi danin, Mizoram Municipalities (Third Amendment) Act Section 157-A hnuaiah hian kawngpui sir vela bawlhhlawh paihte an man nual tawh a, hremte pawh an nei tawh a; chutih rualin, langsart taka tih erawh an la nei lo thung.

Dr H Lalthlangliana chuan, tun hnaia City Task Force ṭhukhawmin Mizoram Muni­cipalities (Third Amendment) Act Section 157-A a nihna ang taka kengkawha drive pui tham tak neih an rel thu a sawi bawk.

Mizoram Municipalities (Third Amend­ment) Act Section 386 tarlan danin, Section 157-A bawhchhiate chu Rs. 5,000 thleng chawitira hrem theih an ni.