FCSCA Minister-in Borkhola Plant a tlawh ; Mizoramin gas a hmuh tipung turin a hrilh

Food, Civil Supply & Consu­mer Affairs (FCSCA) minister John Rotluangliana chuan May 21, Thawhṭanni khan Borkhola LPG Bottling Plant a tlawh a; plant enkawltute chu Mizoramin eirawngbawlna gas ni khata a hmuh ṭhin tipung turin a hrilh.

John Rotluangliana'n tun hnaia Mizoramin eirawngbawlna gas a dawn tlem chhan a zawhna chhangin senior plant manager Lal Ngaisang Khozol chuan, "Gas thun khahna khawl (carouser) kan siam belh vang a ni. He khawl siam belh a nih lai hian hot works (welding etc.)-te khawih a ngaih avangin chetsualna leh intipalh awm thei laka inven nan carouser hman lai chawlhtir a ngai ṭhin a, hei hian ni khata gas thun khah ṭhin ang pangngai thun khat hman loin gas supply a tlem phah a ni," a ti.

Lal Ngaisang Khozol sawi danin, carouser siam belh a nih chhung hian kalphung pangngaia ni khata gas bûr an thun khah ṭhin truck trip 50 vel chu a zahveah a tlahniam a, truck trip 25 vel chauh an thun khat (refill) hman ṭhin a ni.

FCSCA Minister chuan, Mizoramin eirawngbawlna gas ni khata kan dawn zat tipung turin Sr. Plant Manager a hrilh a, "Mizoram tan ni khatah truck trip 12 aṭanga 15 inkar tal supply tum ang che u," a ti.

Minister thusawi hi Lal Ngai­sang Khozol chuan an tihhlawh­tlin tur thu a sawi a, "Carouser siam belh mek hi June 2018 aṭanga hman ṭan theih a ni dawn. Carouser pahnih hman a nih hnu chuan ni khatah truck trip 100 vel gas kan thun khat hman tawh ang," a ti a; carouser pahnih hman a nih hunah chuan eirawngbawlna gas-a harsatna awm ṭhin chu a ziaawm tawh tur thu a sawi.

Transport minister ni bawk John Rotluangliana hian Sonai kawnga Mizoram Transport department ram a tlawh nghal a, hmalak dan tur department hotute a sawipui. He lai hmunah hian guest house, staff quarter, ticketing counter leh bus station-te siam tum a ni.