Zoramin tha thara thawktu a mamawh- Duhoma

Ṭangrual pawl, Zoram Peoples' Movement (ZPM) chief ministerial canfdidate Lalduhoma chuan, Mizoram chu kum 34 chhung hruaitu pahnihin an enkawl chhâwk tawh tih a sawi a, "An theihtawp pawh an chhuah a, min thlenpui chinah kan lawm tur a ni. Hmasawnna kawnga kan hmabak hlen chhuak tur erawh chuan rorelna thar, thawktu thar kan mamawh ta hle,” a ti.

ZPM hian May 21, Thawhṭanni zan khan Zokhawthar, Champhai district-ah vantlang inkhawm an buatsaih a, nimin khan Ruantlangah ZPM Workers Meet buatsaih lehin, Lalduhoma'n thu a sawi a ni.

Lalduhoma chuan, mipuiin ZPM hna thawk theia an siam chuan Mizo­ramin kawlphetha atana a mamawh mega-watt 100 chu kum nga chhungin an thar chhuah hman ngei a beisei thu a sawi a, "Ṭhalai hna thawh tur duh, bul ṭanna nei lote pui turin develop­ment bank siam a ni ang a, mi rintlakte hnenah loan pein, a ṭul dan angin sorkar chu quarantor-ah a ṭang ang” a ti.

ZPM CM Candidate chuan, MLA inthlan lo awm turah Congress tan sum sem vanga inàwi nun chi a ni tawh lo tih sawiin, "A thlakna tur mipuiin an dap a, ZPM leh MNF an khaikhin. Kum 10 chhung Chief Minister nia ro lo rêl tawh, an hun chhunga hmasawnna, boruak rálmuan leh rálmuan loh dante thlir kîr ila, Mizo mipuite hian chul kan rît dawn nge, ram thar kan bawh dawn tih kan ngaihtuah a ngai," a ti a; mipuite'n ram enkawltu thar an duh nia a hriat thu a sawi.

ZPM thupuangtu (spokesman) Vanlalhlana pawhin thu sawiin, "MPC leh ZNP-te an lo thawhho tawh ṭhin chhung khan MPC hotupa Brig. T Sailo leader atana pawma lo ṭawiawm ṭhintu Lalduhoma hi MPC party chuan a pawmin a thláwp tlat a ni a," a ti a; hmun tina MPC mi leh sate chu Lalduhoma thláwp tlat turin a chah.

Vanlalhlana chuan, eng pawl nge ram tana ṭha tur, tu nge ram hruaitu lú atana rintlak an hai tawh lo tih sawiin, "Mizo mipui hian ram rorelna kalphung thar leh hruaitu tharin min hmuak mek. Ṭangrual pawla telte hi ram vei loa hlim taka khawsa thei an ni. Mahse, kan ram dinhmun an en a, an eizawnnain a tuar dawn tih hre chungin an lo pên chhuak a ni. Hei hi hriain Congress leh MNF hian nasa takin min beih rawn ta a ni. 'An thawkho thei chuang lo ang, hruaitu an inruat thei chuang lo ang' tia min beihna dâwtah a chang zo ta," a ti.

ZPM general secretary K Sap­danga pawhin thu sawiin, kumin kum tawp lama MLA thlan hunah hruaitu pathum bûk turte zingah ramin a mamawh pe thei tur ber chîk taka thlira thlang turin mipui a chah.

K Sapdanga chuan, ZPM chuan thuvawn thukphùm, ‘I ram, i hnam leh i sakhua humhim nan, hmasawnna hna thawk rawh,’ tih an neih thu sawiin, "ZPM hian sorkar siam ṭul kan tih chhan chu, kan sakhua leh Zo nun mawi hi humhim kan duh vang a ni. BJP hian MP tam tak nei state-te aiin, MP pakhat chauh nei Mizoram hi an enghelh zawka a lan chhan chu Kristianna humhalh kawngah Mizoram hian a thawh hlâwk ber vang a nih hmel," a ti.

Zokhawthara ZPM vantlang inkhawm hi ZPM Champhai District Stee­ring Committee chairman C Lalrem­liana’n a kaihruai a, Rev. C Lian­zuala’n hunserh a hmang a ni.