Biological Diversity Day hman a ni

Nimin, May 22 kha International Day for Biological Diversity a ni a, he ni pual hian chief minister Lal Thanhawla hoin Art & Culture Auditorium, Berawtlangah hun hman niin, principal chief conservator of forest (PCCF) Lal Ramthanga'n a kaihruai.

Chief Minister chuan, Mizo Kristiante chu thilsiam zawng zawng hnena Chanchin Ṭha hril tur an nih thu sawiin, "Nungcha, thing leh mau humhalh kawngah lehzuala ṭan lak a ngai. Mizorama nungcha, thing leh ramhmul damdawi chi tam takte hi a chhunga chengte'n kan hmelhriat hmain a lo rêm tawh hial a, tunah chuan sorkar leh khawtlangte ṭangrualin a humhalhna kawngah mite hrilhhriat leh venhim hna thawh mek a ni," a ti.

Lal Thanhawla chuan, Mizote chu ṭhangharh tlai deuh mah se, tun aṭanga ram mawina leh hausaknate dimdawi leh humhalh an thiam chuan khawvela nungcha leh thing leh mauah biodiversity tamna ber hmunte zingah kan la tel pha tih sawiin, "Tun hnuah Mizote'n silai aiin camera nen sava leh nungchate veh an chíng ṭan ta hi a lawmawm hle," a ti a; mimal leh pawl zingah Zotheihuan siam an pung zel chu lawmawm a tih thu a sawi.

Ram leh hnam tana mi ṭangkai nihna kawng ṭha tak chu nungcha leh thing leh mau humhalh kawngah mimal leh pawl anga theihtawp chhuah hi a ni tih hria a, ṭan la turin Lal Thanhawla chuan kalkhawmte a fuih.

Chief Minister hian Mizoram State Biodiversity Board leh Catalyst Solutions, Chaltlang te buatsaih ‘Operational Tour Trip’ leh ‘Operational Guidelines for BMC’ te a tlangzarh nghal a ni.

Biological Diversity Day hmannaah hian Mizoram University-a zirtirtu Prof. Lalnundanga'n ‘Floral diversity, Management & Conservation’ tih a sawi a; Mizoram State Biodiversity Board-a technical assistant Dr Lalneihpuia Chhakchhuak-in 'IDB 2018 Theme ‘25 Years of Action on Biodiversity’ tih sawiin, MEFCOF general secretary Prof. H Lalramnghinglova'n Zotheihuan hmalakna leh hlawhtlinna chungchang a sawi bawk.

United Nations Organisation hnuaiah kum 1992 khan Brazil khawpui Rio de Janeiro-a Earth Summit-ah UN Convention on Biological Diversity (CBD) din ni a; chumi denchhen chuan kum tin hman turin May 22 chu International Day for Biological Diversity atan UNO-in a puang a ni.