Sik leh sa inthlak chungchang zirho

Environment, Forest & Climate Change (EFCC), Lunglei Division chuan nimin khan Lunglei DC conference hall-ah NEDP hnuaia hmalakna 'Capacity Building and Training on Climate Change' an buatsaih a, Lunglei Dc Dr Ankita Chakravarty-i'n a hawng.

Lunglei Bawrhsap chuan, kalkhawmte lawmna thu sawiin, "Ramngaw leh nungchate humhalhna kawngah mi tinin mawhphurna kan nei a, hemi lam kawnga mipuite an harh chhuah theihna tur leh chak zawka hmalak a nih theih nan sorkarin theihtawpin ṭan a la chhunzawm zel dawn a ni," a ti.

Inkhawmah hian Lunglei khawpuia sorkar department hrang hrang leh zirna-in hotu te, chanchinbumi te, khawtlang hruaitute leh tlawmngai pawl aiawhte an tel a; Lunglei DFO Dr C Vidhyasagar, MSTIC-a project scientist pahnih James Lalnunzira Hrahsel leh Lalthanpuia ten thupui hrang hrang hmangin kalkhawmte an zirtir a ni.