Drug/ruihhlo tawlhrûk do turin CYMA leh UCYN-in MoU ziak

Central YMA leh Upper Chindwin Youth Network (UCYN), Kalamyo, Sagaing, Myanmar-te chuan nimin khan Central YMA pisaah ruihhlo do kawnga thawhdunna tur thuthlung, memorandum of understanding (MoU) an ziak.

MoU-a an ziah dan chuan, Mizoram leh Myanmar inrina kaltlanga dan loa damdawi/ruihhlo tawlh ṭhin tihtawp a nih theih nan CYMA leh UCYN-te chuan hma an la dawn a; damdawi leh ruihhlo tawlh kaihhnawiha inhnamhnawih leh an chhangte chanchin pawh inhriattir zel te, ramri-te a ṭul anga vil zui te, a ṭul anga inṭanpui tawnte a tel bawk.

MoU-ah hian Central YMA aiawhin president Vanlalruata'n hming a ziak a, Upper Chindwin Youth Network aiawhin director Kyaw Thet Win-a'n hming a ziak thung.