Assam-in truck an rawn chhuah Kolasib leh Cachar DC an inhmu
Nimin khan Kolasib DC Dr H Lalthlangliana chuan Vairengte dái a tlawh a, Cachar DC pawh a kal ve bawk. Lailapur mite chuan, Mizoramin IR police an hnuhkîr loh chuan bungraw phur lirthei kaltlang an la phal loh thu sawi mah se, nizan dar 6 vel aṭang khan truck-te chu an rawn chhuahtir a, truck eng emaw zatin Mizoram an rawn lut.
Cachar DC hian Kolasib DC chu inbiakpuiah a sáwm a, mahse, Kolasib DC-in a duh lo. Chumi hnuah Cachar Bawrhsap chuan lirthei khalhtute tan Mizoram a him thu tal sawi tura a ngen angin, Kolasib DC chuan nimin khan ramri a tlawh a, Kolasib SP Vanlalfaka Ralte-in a ṭawiawm.
Kolasib DC leh SP chuan, lirthei khalhtute tan Mizoram a him thu leh an duh chuan a him leh him loh enchhina Aizawl thleng kal an remtih thu an sawi. Kolasib SP chuan, "Kolasib SP ka nih angin driver-te himna ka tiam thei e," a ti.
Duty post in chhunga hun rei lo tê an inkawmnaah Dr H Lathlangliana chuan, "State pahnih Chief Secretary-te Union Home Secretary kaihhruaina hnuaia an inbiakna ang thlapin kan kal, Mizo IR tlem kan la dah a, minute-ah pawh phal thlap a ni. Kan thua dah chhuah theih a ni lo," a ti.
Lailapur-a páwl pakhat hruaitute chuan, Mizoramin Vairengte dáia Mizo IR an hnuhkìr loh chuan lirthei an chhuah theih loh thu an sawi a; hemi chungchangah hian Kolasib DC chuan, 'Cachar DC nen sawiho rawh u,' tiin an awm khawmna hmun a chhuahsan a ni.
Mizorama lut tur truck tam tham tak Bagha-ah an ding khawm a, nimin khaw èn lai thlengin lirtheite chu an la tâng a, nimin tlai dar 6 vel khan Mizoram panin an chhuahtir ta a ni.
Vanglaini palai zawhna chhangin Kolasib DC chuan, Lailapur piah lama truck tangkhangte chu dar 6 velah an rawn chhuahtir tih a sawi a, "Zan dar 6:30 vel khan Vairengte checkgate an rawn paltlang ṭan. An rawn chhuahtir chhan hi kan hre bik lo a, vawiin (Nilaini)-a kan inhmuhnaah, anmahni'n (Assam lam) chingfel tura dahin ka chhuahsan avangin, Cachar DC leh Lailapur mite chu an indàwr a nih ka ring," a ti.